771

Müstecir değişmedikçe yâhud kontratoyu imzâ iden familya büyüği vefât itmedikçe yapılan kontratonun hükmi dâimâ cârî olub fakat ve müstecir yeniden bir çiftliğe girer ve yâhud bir çiftlikde sâkin olan familyanın kontrato senedini imzâ itmiş olan büyüği fevt olur ise o hâlde eski kontrato senedinin hükmi kalmayacağından tecdîd olunması ve sened yazılacak kâğıdler Der-aliye’de bi’t-tanzîm irsâl olunarak kazâ ve karyelere dağıdılub ve herkese meccanen i’tâ olunub gerek kâğıd pâresi ve gerek resm ve harc olarak ne ashâb-ı alâka ve ne müstecirlerden zinhâr bir akçe alınmaması husûslarına bi’l-cümle memûrîn dikkat ve i’tinâ idecekdir ve bu yolda hükûmet memûrları yâhud karye muhtâr ve kocabaşıları kimseden bir pâre alurlar ise cezâ kânûnnâme-i hümâyûnu ahkâmıyla mücâzât olunacakdır.

On üçünci bend bâlâda bast olunan usûl ve nizâmâtın tamâm-ı icrâsına kemâl-i takayyüd ile ikdâm ve bundan dolayı gerek ashâb-ı alâka ve gerek müstecirîn taraflarından bir gûne ifâde ve şikâyet vukûunda ihâle-i sem’-i dikkat ve ihtimâm ile iktizâları icrâ ve ihkâk-ı hak maddelerine i’tinâ olunmak vâlî ve mutasarrıf ve kâim-makâm ve müdîrlerin vazîfe-i memûriyetleri olmağla bu bâbda müsâmaha idenler mes’ûl ve mu’âteb olacakdır.

Fî 14 Safer sene 1276