783

Sefinelerin edevatı ve kumanyası ve taifesi ve tamiri maddelerinde ve kontratoları ve hamule senedleri misillü sair bilcümle müstacel olan ve muvakkaten hüküm ve icra kılınması lazım gelen deâvî-i ticaret-i bahriye hususlarında dahi cari olabilir.

On ikinci madde: Mahkemeye ihzar olunacak şahsın ikametgâhı Avrupa ve Asya kıtalarında vaki memalik-i berriye-i Osmaniye haricinde olarak memalik-i bahriyesinden Kıbrıs ve Girit ve diğer cezayir-i bahr-i sefid ise iki ay ve yine memalik-i Osmaniyeden Afrika sevahil-i şimaliyesinde vaki mahaller ile memalik-i şahaneye hem-hudud olan memalik-i ecnebiyede ise dört ay ve Avrupa kıtasında memalik-i mahrusaya hem-hudud olmayan memalik-i ecnebiyede ise altı ay ve zikr olunan memalikden başka Afrika ve Asya ve Amerika ve cezayir-i bahr-i muhitde vaki memalik-i baidede ise bir sene mehil ita olunur. Fakat Devlet-i Aliye ile muharib olan bir devletin memalikinde bulunur ise muayyen olan mehil iki kat hesab olunur.

On üçüncü madde: İhzar pusulasının bir nüshası ihzar olunacak kimsenin bizzat kendisine veyahut ikametgâhında kendisiyle sakin bulunan akraba veyahut hizmetkârlarından birine mübaşir marifetiyle ita ve teslim olunur.

On dördüncü madde: İhzar pusulasının ihzar olunacak kimesneye mutlaka ikametgâhında teslimi iktiza etmeyip hariçte tesadüf olunur ve gemide dahi bulunur ise yedine itası caizdir.

On beşinci madde: Mübaşir ihzar pusulasının bir nüshasını ol-vechile ihzar olunacak kimesneye veyahut ikametgâhında bulunan akraba ve hizmetkârlarından birine bil-ita diğer nüshasını dahi teslim olunan kimesne tarafından imza veya temhir ettirip mahkeme kalem odasına teslim ve iade edecektir.

On altıncı madde: İhzar pusulası teslim olunacak şahıs yazı bilmediğini ve mührü dahi olmadığını beyan veyahut imza ve temhir eylemekden istinkaf eder ise ol-halde mübaşir ihzar pusulasının mahalle muhtarıyle merkumun iki nefer...