791

Birisi mecmû-i re'ylerin nısfından ziyâdesine bâliğ olamadığı sûretde tekrâr re'yler toplanılarak adedce ekall bulunan taraf ekser olan taraflardan birine tebaiyyet etmeğe mecbûr olacaklardır.

Elli birinci madde — Müsâviyen ihtilâf-ı ârâ vukûunda reîsin veyâ riyâsete kâim olan zâtın re'yi iki re'y makâmında tutulur.

Elli ikinci madde — Karâr-ı hükm bir kerre hâsıl oldukda reîsi tarafından meclisde alenen beyân olunur.

Elli üçüncü madde — Bâlâda muharrer otuz ikinci madde mûcibince tarafeynin bizzât gelmelerine hükm lâhik olduğu sûretde gelecekleri günün dahi ta'yîn olunması lâzımedendir.

Elli dördüncü madde — Tarafeynden birinin tahlîfine karâr verildiği hâlde kangı maddeler üzerine tahlîf olunacağı dahi tasrîh kılınacakdır.

Elli beşinci madde — Zarar ve ziyân i'tâsı hükm olunmasile berâber ne mikdâr meblağ i'tâ olunacağı veyâhud henûz ma'lûm olmadığı sûretde müsted'îsi tarafından müfredât defterinin meclise i'tâsı beyân ve tenbîh olunacakdır.

Elli altıncı madde — Medyûnun zarar dîde olub da sahîhan bir hâl-i muzâyakada bulunduğu tahakkuk ve tebeyyün etdiği ve te'diye-i deyn içün kendisine bu hâlden dolayı bir va'de-i mu'tedile i'tâsı meclisçe münâsib görüldüğü hâlde asıl da'vânın hükmile berâber verilecek va'de dahi sebebleri bil-beyân i'tâ olunacakdır.

Elli yedinci madde — Medyûnun malı dîger alacaklılarının istid'âsı ile satılmış veyâ hâl-i iflâsı vukû'bulmuş ve firâr edüb aleyhine gıyâben da'vâ olunmuş veyâhud habse ilkâ kılınmış veyâ dâinine bâ-sened vermiş olduğu te'mînâta halel getirmiş olduğu hâlde medyûn-ı merkûm te'diye-i deyn içün bir mehil istihsâline nâil olamayacağı misillü i'tâ olunmuş olan mehilden dahi istifâde edememesi lâzımedendir.

Elli sekizinci madde — Ticâret kânûnnâmesinin yüz on dördüncü ve yüz kırk dördüncü maddeleri mûcibince bir poliçe senedi veyâ sipâriş tahvîli bedellerinin