820

Resmin mikdarı terkim olunacaktır. Evrak tercüme olunduktan sonra tercümeleriyle beraber sahibine bi’l-ita defterine şerh verilerek teslimi mübeyyin verilmiş olan sened istirdad olunacaktır.

Kırkıncı Madde: Tercüme olunacak evrakın aded-i kelimatı yüz elliden noksan olur ise yirmi dört saat zarfında tercüme ve yüz elliyi mütecaviz bulunur ise her yüz elli kelime içün müddet-i mezkûreye bir gün ilave olunacaktır.

Kırk Birinci Madde: Tercüme müsveddeleri mütercimi tarafından mümza olarak numara sırasıyla mücelled olarak hıfz olunacaktır.

Kırk İkinci Madde: Mübeyyizler tercüme müsveddelerini tebyiz ettikten sonra beyazlarını imza edeceklerdir.

Kırk Üçüncü Madde: Mütercimlere ve kalem memurlarına ita olunacak senedat ve evrakın hüsn-i muhafazasına dikkat olunacak ve senedat ve evrak-ı mezkûre kasden veya sehven zayi ve telef olur ise mücazat-ı kanuniyesi icra olunacaktır.

( Fasl-ı Râbi )

( Deavi Kaleminden Alınacak Rüsumat Tarifesine Dairdir )

Kırk Dördüncü Madde: Deavi kaleminden alınan bi’l-cümle rüsumat işbu nizamname zeylinde muharrer tarife mucibince ahz olunacak ve işbu tarifenin hükmü üç sene cari olup hitamında yeniden rüyet olunacaktır.

Kırk Beşinci Madde: Umur-ı devlete müteallik olup Ticaret Nezareti’nin emriyle tercüme olunacak evrak-ı resmiye içün bir gûne harç alınmayacaktır.

Kırk Altıncı Madde: Rüsumat-ı mukarrereden ne mikdar resim alınır ise ahzini müşir matbu koçanlı defterden maktu bir kıt’a ilmühaber verilecek ve alınan meblağ tarih ve numara ve miktarıyla sandık defterine kayd olunacaktır.

Kırk Yedinci Madde: Deavi kalemi hasılatı mah-be-mah ne mikdara baliğ olur ise masarif-i kırtasiye ba’de’l-ihraç fazlası Ticaret Veznesine teslim olunacak ve her sene hitamında bir kıt’a muvazene defteri yapılarak nezarete takdim kılınacaktır.

( Ticaret )