824

İdecek ve işbu icmal bi’t-tedkik kabul olundığı halde defter-i mahsusuna
kayd olunacaktır.
Dördüncü madde — İşbu kalemin kâffe-i muamelat ve icraatından müdiri bizzat
mesul olacaktır.

İrade-i seniye tarihi fi 16 Rebiülevvel sene 1285
ve fi 14 Haziran sene 1284

( Ticaret-i Bahriye Deavi Kaleminde Alınacak )
( Rüsumun Tarifesi )

Numara
1 — Yüz yirmi yaprağı havi olub sahifelerine numara vaz‘ ve sah keşide
olunacak bir kıt‘a sefine yevmiye defteri içün yirmi beş guruş
2 — Bahr-i Sefid ve Bahr-i Siyah boğazları haricinde olan büyük seferin yevmiye
defterinin tasdiki içün on beş guruş
3 — Bahr-i Sefid ve Bahr-i Siyah boğazları beyninde olan küçük seferin yevmiye
defterinin tasdiki içün beş guruş
4 — Sahifelerine numara ve sah keşide olunacak bir kıt‘a librado içün
on guruş
5 — Kanunname-i Ticaret-i Bahriye’nin bir nüshasıçün on guruş
6 — Manifesto tanzimi içün kırk guruş
7 — Provadi forte tanzimi içün otuz guruş
8 — Tahmiliye senedatının beher nüshası içün beş guruş
9 — Sigorta senedi tasdik ve kaydı içün elli guruş
10 — Bir sefinenin veya hissesinin veyahud alet ve edevat ve eşya-yı sairesinin
bi’l-muzayede füruhtu içün semeni elli bin guruşı tecavüz etmediği halde
yüzde iki ve elli bin guruşı tecavüz etdiği takdirde fazlasıçün yüzde
bir guruş

(Bir sefinenin...)