83

Ve bir kimse sâkin olmak üzere isticâr eylediği hânede sâkin olmayıp da eşyâ vaz' edecek olsa câiz olur. Ammâ attârlık etmek üzere isticâr eylediği dükkânda demircilik işleyemez.

427 Madde: Her şey ki müstamelînin ihtilâfıyla muhtelif olmamada takyîd muteberdir. Meselâ bir kimsenin rükûbu için istikrâ olunan ata başkası irkâb olunamaz.

428 Madde: Her şey ki müstamelînin ihtilâfıyla muhtelif olmaya, onda takyîd lağvdır. Meselâ bir kimsenin süknâsı için isticâr olunan hânede başkası iskân olunabilir.

429 Madde: Gerek kâbil-i taksim olsun ve gerek olmasın bir kimse hisse-i şâiasını şerîkine îcâr edebilir ise de âhara îcâr edemez. Fakat ba'de'l-muhâyâe nöbetini îcâr edebilir.

430 Madde: Şüyû-ı târî akd-i icâreyi ifsâd etmez. Meselâ bir kimse hânesini îcâr ettikten sonra nısf hissesi bir müstahak tarafından zabt olunsa bâkî hisse-i şâia hakkında icâre bâkî kalır.

431 Madde: İki şerîk birlikte olarak mal-ı müştereki şahs-ı âhara îcâr edebilirler.

432 Madde: Bir şeyi iki kişiye îcâr etmek câizdir. Ve her biri ücretinden kendi hissesine âid olan mikdârı verip yekdiğere kefîl olmadıkça birinin hissesi diğerinden alınamaz.

( Bâb-ı Sânî )

( Akd-i icâreye müteallik mesâil beyânında olup dört faslı hâvîdir )

( Fasl-ı Evvel )

( Rükn-i icâreye dâir olan mesâil beyânındadır )

433 Madde: Bey' gibi icâre dahi îcâb ve kabûl ile münakid olur.

434 Madde: İcârede îcâb ve kabûl, îcâr ettim ve kirâya verdim ve isticâr ettim ve kabûl ettim gibi akd-i icâre için müstamel olan sözlerdir.

435 Madde: İcâre dahi bey' gibi mâzî sîgasıyla münakid olup müstakbel sîgasıyla münakid olmaz.