85

442 Madde Müstecir irs yâ hibe gibi bir vechile ayn-ı me'cûre mâlik olıcak icârenin hükmü kalmaz.

443 Madde Mûcib-i akdin icrâsına mâni‘ olur bir özür zuhûr etdikde icâre münfesih olur.
Meselâ düğün içün bir aşcı isticâr olundukda ahad-ı zevceyn fevt olsa icâre münfesih olur.
Ve kezâ dişi ağrıyan kimse dişini çıkarmak üzere şu kadar guruşa bir dişçi ile mukâvele etmiş iken ağrı zâil oluyorsa icâre münfesih olur.
Kezâlik müstarda‘ın vefâtiyle icâre münfesih olmayub ammâ çocuğun yâhud süd ananın vefâtiyle münfesih olur.

( Fasl-ı Sânî )

( İcârenin şerâit-i in‘ikâd ve nefâzı hakkındadır )

444 Madde İcârenin in‘ikâdında âkideynin ehliyeti ya‘ni âkıl mümeyyiz olmaları şartdır.

445 Madde Büyû‘da olduğu gibi icârenin in‘ikâdında dahi îcâbın kabûle muvâfakati ve meclis-i akdin ittihâdı şartdır.

446 Madde Âcir îcâr edeceği şeyin mutasarrıfı yâhud mutasarrıfının vekîli yâ velîsi veyâ vasîsi olmak lâzımdır.

447 Madde Fuzûlînin îcârı mutasarrıfın icâzetine ve mutasarrıfı sagîr veyâ mecnûn ise ecr-i misl ile îcâr olundığı sûretde velîsinin veyâ vasîsinin icâzetine mevkûfen mün‘akid olur.
Fakat icâzetin sıhhatinde dört şeyin ya‘ni âkideyn ve mâlik ve ma‘kûdün aleyhin ve bedel-i icâre urûzdan oldığı takdîrde anın dahi kıyâm ve bekâsı şart olub bunlardan birisi ma‘dûm olsa icâzet sahîh olmaz.

( Fasl-ı Sâlis )

( Sıhhat-i icârenin şerâiti hakkındadır )

448 Madde İcârenin sıhhatinde âkideynin rızâsı şartdır . . . . .