98

Kezâlik hânenin ve su yollarının ve künklerinin tâmir ve ıslâhı ve süknâya muhill olan şeylerin inşâsı ve binâya müteallik sâir işler hep sâhibi üzerine lâzımdır.
Ve eğer sâhibi bunları yapmaktan imtinâ eder ise müstecir ol hâneden çıkabilir.
Meğer ki isticâr ettiği vakit ol hâne bu hâl üzere olup da ânı görmüş ise ayıba râzı olmuş demek olmakla sonradan bunu bahâne ederek ol hâneden çıkamaz.
Eğer müstecir bu şeyleri kendi tarafından yapar ise teberru kabîlinden olup masrafını âcirden talep edemez.

530 Mâdde — Âcirin izniyle müstecirin icrâ ettiği tâmirât eğer damın kiremidini aktarmak gibi mecurun ıslâhına ve halel tatarrukundan sıyânetine âid ise masrafı âcirden almak şartı zikr olunmamış ise bile müstecir bu tâmirâtın masrafını âcirden alır.
Ve eğer hânenin fırınını tâmir etmek gibi mücerred müstecirin menâfiine âid ise öyle bir şart zikr olunmadıkça müstecir ânın masrafını âcirden alamaz.

531 Mâdde — Müstecir bir akâr-ı mecurda binâ ihdâs eylese yâhud ağaç dikse icârenin inkızâsında âcir muhayyer olur dilerse ol binâyı yâhud ağacı kal’ ettirir ve dilerse kıymetini az olsun çok olsun verip ibkâ eder.

532 Mâdde — Müddet-i icârede terâküm eden toz ve toprak ve süprüntünün tathîr ve izâlesi müstecir üzerinedir.

533 Mâdde — Müstecir mecuru tahrîb eder olup da âcir men’ine muktedir olamazsa hâkime mürâcaatla icâreyi feshettirebilir.

( Fasl-ı Sâni )
( İcâre-i Urûz Hakkındadır )

534 Mâdde — Müddet-i malûme için bedel-i malûm mukâbilinde elbise ve esliha ve çadır ve emsâli menkûlâtın icâresi câizdir.

535 Mâdde — Bir kimse bir mahalle gitmek üzere elbise isticâr ettikte...