159

Cihatın dahi kezalik diger ehl ve erbabına tevcih kılınması nizamı iktizasından olduğundan aňa göre iktizalarının icrasına dikkatle hilaf-ı usul ve nizam cihat tevcihi inhasıyla tekrar muhabere ve istilama hacet bırakılmaması ve bu vesile ashabının tul-i müddet intizar ve ıztırara düşürülmemesi lazımedendir.

Otuz ikinci bend: Evkaf-ı mazbute ve mülhaka hayratı cihatından metruk ve bi-lüzum bulunan cihetlerin mutasarrıflarına hall vukuunda evlad veyahut ahara tevcihiçün mahallerinden ilam ve mazbata verilip nizamı vechle vazifeleri vakfa irad kayd olunmak üzere keyfiyetleri ba-mazbata hazineye iş'ar kılınacaktır.

Otuz üçüncü bend: Mazbut evkaf-ı şerife hayratından cevami ve mesacid ve meberrat-ı saireden el-yevm mahallerinde mevcud ve ma'mur bulunanların hizmetinin eda-yı hizmet edip etmediklerine ale'd-devam evkaf müdirleri tarafından nezaret ile bunlara bila-kusur ifa-yı hizmet ettirmeğe sa'y olunacak ve içlerinde eda-yı hizmet etmeyen ve na-ehil olduğu tahakkuk edenlerin cihetleri meclisçe bi'l-imtihan ehliyetleri tahakkuk edecek kesan uhdelerine tevcih olunmak üzere hakikat-i ahval ve keyfiyetleri ba-ilam ve mazbata hazineye bildirilecektir.

Otuz dördüncü bend: Tevliyet ve zaviye-darlık ve mezra-darlık ve sair bu misillü cihatın hîn-i tevcihatında vakıfları muhasebelerinin bilinmesi lazım geldiğinden tekrar istilama hacet kalmamak üzere o makulelerden muhasebesi görülmemiş bulunanların kaç senelik muhasebatı var ise rüyet olundukça tevcihiçün ilam ve mazbata verilmeyecektir.

Otuz beşinci bend: Muceddeden vakf ve hayrat yapmak murad eden olur ise evvel emirde yapacağı vakfın ve hayratın mahallince ve ahalice lüzumu ve muhassenatı olduğu ve ol kimse ashab-ı servetten olup da vakf edeceği musakkafat ve müstagallat ve nukudun hasılat ve neması ihdas eyleyeceği cihat ashabına vakt ve hale göre vazife ve maaş tertibine ve vakfın mühimmatı ve vaki olacak tamiratı masarıfına vefa edeceği muhakkak olduğu ve tanzim olunacak vakfiye usul-i şer'iyesine...