19

Altmış birinci madde: Masarifata müteallik tedkikat ikmal olunduktan soñra her liva için açılmış olan defterde bulunacak her nevi varidatı mahsus hanelerine kayd ile beraber hazine muvazenesinde tayin olunmuş olan varidatın ay içinde vukubulan tahsilatı takasit-i te’diyeye muvafık olup olmadığı tedkik olunacaktır.

Altmış ikinci madde: Bir livadan gelmiş olan şehriye defterinde vukubulan tahsilat o ayda düşen takasite muvafık olmadığı yani her cins varidatın tahsilatı tertib-i muayyenine tevafuk etmediği halde te’kidat-ı lazimenin icrası için keyfiyetin elli dokuzuncu maddede muharrer olan hulasasına derciyle defterdara verilecektir ve bir sancağın tahsilat ve irsalatı ve masarifatı için sal-i hâle başka ve sinîn-i sabıkaya başka olarak iki kıt’a ilmühaber yazılıp vali ve defterdar tarafından bi’t-temhir ita kılınacaktır.

Altmış üçüncü madde: Livalardan sal-i hâl için başka ve sinîn-i sabıka için başka olarak gelecek sal muhasebe defterlerinin masraf ve varidat cihetleri tedkik ve her cins emvalin tahsilat ve bakayası ve masarifatın medfuat ve düyunu kuyudiyle tatbik edildikten soñra idare meclisinden dahi bi’t-tasdik re’s-i livaya bir kıt’a suret-i muhasebe ita olunacak ve beher mâh şehriye defterlerinin üzerine verilmiş olan ilmühaberleri dahi istirdad olunarak iptal keşidesiyle muhasebede hıfz kılınacaktır.

Altmış dördüncü madde: Vilayet muhasebesi her ay için beher livanın varidatını bir cihete ve emvalin icmalini zeyline ve masarifini diğer cihete yazarak emvalin envaını ve masarifin cins ve miktarını göstererek bir defter ve her bir cins masraf için ayrı ayrı bir kıt’a hulasa yapıp meclis-i vilayette tedkik olunmak üzere vilayet defterdarına ita eyleyecek ve vilayet meclisinde dahi tedkikat-ı mukteziyenin ikmaliyle zîri tasdik ve temhir kılınarak elviyeden gelecek senedat ve defatir ve mazabatın rabtıyla hazine-i celileye irsal olunacak ve oradan dahi bi’l-kabul vilayet muhasebesine ilmühaberi gönderilecektir.