190

Kız rüşdiye mekteblerinde mebadi-i kavaid-i Arabiye ve Farisiye yerine kendü lisanları okutturulacaktır. Ve altıncı ve yirmi üçüncü maddelerde beyan olunan kaideye tevfikan gayr-i müslim etfalinin umur-ı mezhebiye dersleri rüesa-yı ruhaniye marifetleriyle bi't-tayin tedris olunacaktır.

Otuzuncu Madde: Kız mekteb-i rüşdiyelerinin ikiden dörde kadar muallimesi olacak ve bunlardan başka ameliyat-ı hayyatiye ve musiki için dahi birer hocası ve birer mubsır ile bevvabı bulunacaktır. Bu mekteplerin muhassasat-ı seneviyesi nihayet kırk bin kuruş olup Maarif İdaresi sandığından tesviye kılınacaktır.

Otuz Birinci Madde: Yedlerinde sıbyan mektebi şehadetnamesi olan kızlar bila-imtihan rüşdiyeye kabul kılınacak ise de şehadetnamesi olmayanlar imtihan olunup mertebe-i kafiyede ehliyeti sabit olduğu halde alınacaktır.

Otuz İkinci Madde: Kız mekteplerinin suret-i idare ve eyyam-ı tatiliye ve şerait-i sairesi etfal-i zükûra mahsus rüşdiyeler hakkında mevzu olan ahkâm-ı nizamiyeye tabi olacaktır.

( Fasl-ı Sâni )
( Mekâtip-i İdadiye )

Otuz Üçüncü Madde: Mekâtip-i idadiye mekatib-i rüşdiyede ikmal-i tahsil etmiş olan İslam ile sunuf-ı gayr-i müslime çocuklarının muhtelitan talim ve tedrisleri için mevzuudur.

Otuz Dördüncü Madde: Bin haneyi mütecaviz olan ve hal ve mevkilerince lüzum görünen kasabalarda birer mekteb-i idadiye yapılmak mukarrerdir.

Otuz Beşinci Madde: Mekâtip-i idadiyenin masarif-i inşaiyesi ve muallim ve hademesinin muhassasatı ve sair kâffe-i masarifatı Vilayet Maarif İdaresi sandığından tesviye kılınacaktır.

Otuz Altıncı Madde: Her mekteb-i idadiyenin ulûm-ı muhtelife için muavinleriyle beraber altışar nefer muallimi olup bunlar Dersaadet'teki Büyük Darülmuallimin şehadetnamesi ve Maarif Nezaret-i Celilesinin re'yi ile intihab ve tayin kılınacaktır ve her mekteb-i idadiyenin mubsır ve bevvab gibi hademesi dahi olacaktır.

Otuz