193

Sultanînin müddet-i tahsiliyesi üç ve kısım-ı âdî ile altı senedir. Kısım-ı âdî dersleri mekteb-i idâdiye cedvelinde gösterildiği gibi olup kısım-ı âlî dersleri zîrdeki cedvelde beyân olunur.

( Kısım-ı Âlî )
( Edebiyat Sınıfı )

Türkçe, fenn-i kitâbet ve inşâ. Arabî ve Fârisîden edebiyâta müteallik müellefât. Maânî. Fransızca. İlm-i servet-i milel. Hukuk-ı milel. Târîh.

( Ulûm Sınıfı )

Hendese-i resmiye. Menâzır. Cebr. Ve cebrin hendeseye tatbîkı. Müsellesât-ı müsteviye ve küreviye. Hey’et. Hikmet-i tabîiye. Ve kimyânın muhtasar sûretle sanâyi ve zirâate tatbîkı. İlm-i mevâlid. Fenn-i tahtît-i arâzî.

Kırk yedinci mâdde: Kırk altıncı mâddede muharrer fünûn ve ulûmun sûret-i tedrîsi cedvel-i mahsûsu mûcibince günlere münkasım olduğundan ol vechile tedrîs olunacaktır. Ve mahallerince bi’t-tecrübe ba’zılarının tebdîl ve tagyîri lâzım gelir ise ta’dîlât-ı muktaziye Maârif Nezâret-i Celîlesinden istîzân ve Meclis-i Kebîr-i Maârifin re’y ve tensîbine mevkûfdur.

Kırk sekizinci mâdde: Mekâtib-i sultâniyenin ta’tîl zamanları ve mevsim-i imtihanları aynile mekâtib-i rüşdiye ve idâdiyedeki gibi olup fakat leylî olan talebenin ta’tîl geceleri mektebde veyâhûd hâricde kalması mahalleri maârif idârelerinin karârına muallakdır.

Kırk dokuzuncu mâdde: Mekâtib-i sultâniyede tahsîl-i ulûm ve fünûn eden talebeden kısım-ı âlî derslerinde bulunanlar nizâmı mûcibince imtihan olmak salâhiyetine nâil olduklarından esnâda bulunan talebenin kısım-ı âlî derslerinden imtihanları bi’l-icrâ iktidârları sâbit olur ise o sene kur’asından mu’âf tutulacaklardır.

Ellinci mâdde: Mekâtib-i sultâniyede müddet-i tahsiliyesini ikmâl etmiş olup da usûlü üzere imtihanları icrâ kılınanlardan ruûs alanlar imtihan nizâmnâmesinde beyân olunan imtiyazâta kesb-i istihkâk edeceklerdir ve imtihanda isbât-ı ehliyet edemeyenler bir sene daha mektebde kalabileceklerdir.

fî
25