23

Üçüncü Bend
Hristiyan karyelerinde yapılacak defterleri Türkçe yazdıracak adamları olmadığı halde kendi lisanlarınca yazacaklardır. Ve ol defter meclis-i mezkûrda aynen tercüme olunarak kuyûd defterine kayd olundukdan sonra asıl defter bend-i sâbıkda beyan olunduğu vechle tasdik ve temhir olunarak iade kılınacakdır.

Dördüncü Bend
Verginin hîn-i tevziinde bir karye ahalisinden bazılarına sâir komşularına nisbetle derece-i iktidarlarından ziyade vergi tarh olunmak ve bazıları ashâb-ı nüfûzdan olarak veyahud ashâb-ı nüfûz tarafından himaye kılınarak kudretlerine nisbetle vergileri az tayin kılınmak gibi haller vukuu melhuz olduğundan kaza meclisleri bu misillü hâlâta tahsîl-i vukûf etdikçe ihkak-ı hakka mübadere eyleyeceklerdir. Ve kazaca hall ve tesviyesi kabil olamayan şeylerde kaza müdiri re’s-i livaye ifâde-i hâl etmeğe memur ve mecburdur.

Beşinci Bend
Her karyede verginin tahsiline başlanıldıkda imam ve papas ve muhtarlar vergilerine mahsuben her kimden ne mikdar akçe tahsil ederler ise ol adamın sâlifü’z-zikr tevzi defterinde muharrer olan vergisine teslim kayd olundukdan sonra defterle beraber akçeyi alub re’s-i kazaya gitdiklerinde akçe ta’dâd ve gelen deftere tatbik ve herkesin vermiş olduğu akçe ol defter mucibince kaza meclisinde olan kuyûd defterinde dahi vergisinden mahsub kılındıkdan sonra akçe kabz olunarak tevzi defterinde teslimatın zencir vechle kaydı içün ittihaz olunan mahalle dahi gelen akçenin mikdarı yazılıb ve tarih çekilib yanına müdir ve sandık emini taraflarından mühür basılacakdır.

Altıncı Bend
Bazı karyelerde bu vechle tevzi defteri yazacak kadar okur yazar adam bulunmadığı suretde çünki bu madde senede bir kerre olacağından ol halde kaza meclisinden verilecek sâlifü’z-zikr vergi pusulası mucibince ahali-i karye kendü âdet ve usulleri[n]ce vergiyi beynlerinde tevzi etdikden sonra imam ve papas ve muhtarlar ve ahalinin mutemedi olan diğer bir iki kimesne re’s-i kazaya gelüb suret-i tevzii kaza meclisine şifâhen