235

On Altıncı Madde: Umuma mahsus olan kitaplar kezalik üç nevi olup en alasına birinci mükafat ve bunun madununda bulunana ikinci mükafat verilecek ve üçüncüsü yalnız zikr-i cemile müstahak olacaktır.

On Yedinci Madde: Derecat-ı selasede nail-i mükafat olan her dürlü müellefatın on nüshası müellifleri tarafından bila-bedel Maarif Nezaret-i Celilesine verilecek ve bunlar Meclis-i Kebir-i Maarif ve Darülfünun kütüphanelerine ve diğer iktiza eden kütüphanelere vaz olunacaktır.

( Nev-i Salis )
( Bir bedel tayiniyle telif ve tercüme ettirilen kitaplar )

On Sekizinci Madde: Bedel-i maktu ile kitap telif veyahut tercüme etmek isteyenler Meclis-i Maarife gösterecekleri numuneye muvafık olmak şartıyla bir kitap telif veyahut tercümesini taahhüt edecekler ve bunun mukabilinde hasbe'l-mukavele tayin olunan akçeyi tamamen ahz eyleyeceklerdir.

On Dokuzuncu Madde: Bu makule müellifler vakt-i muayyende kitaplarını teslim edemedikleri halde reddolunup bedel-i maktuu dahi verilmeyecektir.

Yirminci Madde: Bu makule sipariş olunacak kitaplar dahi taliplerinin malumu olmak üzere iktiza ettiği halde ilan olunacaktır.

Yirmi Birinci Madde: Bu suretle sipariş olunan kitaplar münasip miktar eczaya taksim olunarak müellif hitam bulan cüzleri evkat-ı muayyenede meclise takdim edecek ve bunlar ba'de'l-mütalaa numuneye muvafık olduğu halde mukarrer olan bedelin evvel cüze isabet eden mikdarı kendisine ita ile getirdiği cüz alıkonulacaktır.

Yirmi İkinci Madde: Müellif tertip eylediği kitabın eczasından birisini vakt-i muayyeninde getirmediği ve ol babda şayan-ı kabul bir özr-i kavi dahi beyan edemediği halde on beş gün daha intizar olunduktan sonra mukavele-i vakanın henüz icra olunmamış ciheti keenlemyekün hükmünde tutulup kitap diğerine sipariş olunacaktır.

Yirmi Üçüncü Madde: Kitapların ne suretde ve ne şerait ile telif veyahut tercüme ettirileceğini mübeyyin tanzim olunan mazbatanın musaddak bir kıta sureti mütaahhid olan zat yedine verilecektir.