255

...etdirilecek ve iktizâ etdiği hâlde te’dîb dahi kılınacakdır.....

Elli ikinci madde şâkirdândan birisi diğeri hakkında tecavüz-i hâl ve harekette bulunur ise mağdur olan taraf mukabele bi’l-misle kalkışmayıp muallim-i evvele şikayet edecek ve anın vasıtasıyla hakkını ihkak etdirecekdir.

Elli üçüncü madde mekâtib-i rüşdiyeye alınacak şâkirdân maârif nizâm-nâmesinin on dördüncü ve yüz elli dördüncü maddelerine tevfîkan ahz ve kabûl kılınacakdır.

Elli dördüncü madde henüz çiçek çıkarmamış olan ve yedlerinde aşı tasdîknâmesi bulunmayan etfâl mekâtib-i sıbyâniyeye kabûl olunmadığı misillü rüşdiyelere dahi alınmayacakdır.

( Mubassır ve Bevvâbın Vezâifi )

Elli beşinci madde mubassır şâkirdânın mektebe tecemmu'larından dağıldıkları vakte kadar mektebde hâzır bulunup gerek ders esnâsında ve gerek teneffüs vakitlerinde şâkirdânın ahvâl ve harekâtına nezâret ve dikkat edecekdir.

Elli altıncı madde mubassır mugayir-i âdâb bir hâl ve hareket müşâhede etdiği hâlde muallim-i evvele beyân ve ifâde edecek ve dershânelerde ve mütâlaa hânelerde gezinip dikkatini şâkirdânın üzerinden eksik etmeyecekdir.

Elli yedinci madde mubassırlar şâkirdân gerek abdest alır ve gerek edâ-yı salât eder iken dâimâ gezinip talebenin evzâ ve harekâtına dikkat ve nezâret eyleyecekdir.

Elli sekizinci madde bevvâblar dâimâ mektebde bulunup şâkirdân dağıldıktan sonra mektebi süpürüp dershânelerin nezâfetine dikkat edecekdir.

Elli dokuzuncu madde bevvâblar mektebin kapusunu vaktinden evvel açıp esbâb-ı mücbire olmadıkça şâkird kabûl etmeyecek ve vakti muayyeni dahi geçirmeyecekdir.

Altmışıncı madde bevvâblar dâimâ kapu önünde durup muallim-i evvel tarafından ruhsat olmadıkça hiç bir şâkirdin mektebden taşarıya çıkmasına müsâade etmeyecekdir.