256

Altmış birinci madde: Bevablar şakirdanın ayak kabları ile eşyayı sairesini marka vererek hıfz edecek ve bir gûne zayiât olduğu halde mesûl olacakdır.

( Mükâfât beyanındadır )

Altmış ikinci madde: Şakirdandan biri bir ay mütemadiyen dersini lâyıkı vechle yapdığı ve hüsn-i hareketde bulunduğu halde derece-i liyâkatine göre birinci mevkilerde bulunur.

Altmış üçüncü madde: Şakirdandan üç ay mütemadiyen birinci mevkilerde bulunanlara muallim-i evvel tarafından bir kıt’a tahsinnâme i’tâ kılınacakdır.

Altmış dördüncü madde: Bir şakird mütemadiyen altı ay dersini güzel okuduğu ve âdâba muvafık suretle hareket etdiği halde kendisine tahsinnâme virildikden başka sınıfın en birinci mevkiine ik’âd olunup merkumun hüsn-i hali sınıfı şakirdanına muallimi tarafından beyan olunacak ve ismi dahi dershanelerde muallak olan levha-i mahsusaya celî yazı ile tahrir olunacakdır.

( Mücâzât beyanındadır )

Altmış beşinci madde: Tokat ve şamar ve falaka ve daha sâir bu misillü ukûbât-ı cismâniye mekteblerde kaviyyen memnu’dur.

Altmış altıncı madde: Şakirdandan biri dersini lâyıkı vechle yapmadığı veyahud haftada bir defa mektebi terk etdiği halde kendisine muallimi tarafından tenbih ve nasihat edilüp sınıfı şakirdanının teneffüs etdiği vakitde mücâzâten dersine çalışdırılacakdır.

Altmış yedinci madde: Bir şakird bir hafta dersine çalışmaz ise mensub olduğu sınıfın mücâzât mevkiine ik’âd olunup bir hafta müddet teneffüs vakitlerinde mücâzâten dersine çalışdırılacakdır.

Altmış sekizinci madde: Bir şakird bir ay mütemadiyen dersine çalışmadığı veyahud haftada iki üç defa mektebe gelmediği halde muallimi efendi velisiyle lede’l-muhabere adem-i devamı bir özr-i kaviye mebni olmadığı anlaşılıyor ise ol şakird kaç gün gelmediyse ol kadar gün teneffüs vakitlerinde dersine çalışdırılacak ve devamsız olduğunu müş’ir ismi dahi ceza tahtasında muharrer olarak bir hafta durdurulacakdır.

Altmış