258
( Mekteb )
( Sanâyi‘ Nizâmnâmesidir )
( Mukaddime )

Mekteb-i Sanâyi‘ Memâlik-i Mahrûse’de eñ ziyâde lüzûmu olan san‘atlarıñ ameliye [ve] ameliyâtı ögredilmek içün vaz‘ edilmiştir. Usûl ve kâidesi dört bâba münkasim olub birinci bâb mektebiñ ahvâl-i esâsiye ve umûmiyesi, ve ikinci bâb me’mûrlarınıñ vezâif ve harekât-ı muktaziyesi, ve üçüncü bâb me’mûrîn ve talebe ve şâkirdânıñ mükâfât ve mücâzâtı beyânındadır. Ve işbu bâblarıñ her biri fusûl-i adîdeye münkasimdir.

( Bâb-ı Evvel )
( Birinci Fasıl )
( Mektebiñ vaz‘-ı aslisile kavâid-i umûmiyesi beyânındadır )

Birinci Mâdde — Mekteb-i Sanâyi‘ İrâde-i Seniyye-i Hazret-i Pâdişâhî ile müesses olub muhassasâtı Hazîne-i Celîle’den ta‘yîn buyurulmuş ve nezâret-i umûmiyesi Şûrâ-yı Devlet Riyâset-i Celîlesine mufavvaz bulunmuş olmağla idâresine müteallik kâffe-i icrâât makâm-ı riyâsetden vukû‘bulan re’y ve emre tatbîkan rü’yet olunur. Ve umûr-ı hesâbiyesi ve aña müteallik mesâlih-i câriyesi Şûrâ-yı Devlet Nâfi‘a Dâiresinde tedkîk edilir.

İkinci Mâdde — Mekteb-i Sanâyi‘de ta‘lîm olunacak hiref ve sanâyi‘ timurcılık ve dökmecilik ve makinecilik ve mi‘mârlık ve marangozluk misillü i‘mâlât-ı ma‘deniye ve ahşâbiye ile terzilik ve kunduracılık ve mücellidlik gibi san‘atlar olub tedrîs ve ta‘lîm edilecek dersler dahi bu san‘atlara muktazî olan fünûn ve ulûmdur.

Üçüncü Mâdde — Mekteb-i Sanâyi‘ iki şu‘beye münkasim olub birisi dâhilî ve dîgeri hâricîdir. Dâhilî şu‘besinde olan talebe ve şâkirdân on üç yaşından aşâğı olmak ve leylî ve nehârî orada kalmak üzere müretteb olub adedi beş yüz neferi tecâvüz etmeyecekdir. Hâricî şu‘besiniñ talebesi otuz yaşına kadar olmak ve mutlaka işe yaramak ve san‘at ve ma‘rifet tahsîl etmek ve yalnız gündüzleri devâm ile giceleri hânelerine avdet etmek şartıyla alınub bunlaryñ adedi dahi iki yüz neferi geçmeyecekdir.

( Dördüncü )