268

Otuz üçüncü madde: Harici şubesi müdir ve muaviniyle kâtiplerinin vazifeleri dahi talebe-i hariciyenin kezalik işbu nizamnamede tayin olunan usul ve kaideye tatbikan talim ve tedrisleriyle imalat-ı sınaiye içün alınıb verilen kâffe-i eşya ve edevatın hesablarını layıkıyla tutmak ve hiç bir gûne telef ve israfa meydan vermemek ve ambarcı ve imalat müfettişi ve odacı gibi memurların ve imalat ustalarının işlerine daima dikkat ve nezaret etmek ve'l-hasıl fünun ve sanayiin ilerlemesine çalışmak hususlarıdır.

Otuz dördüncü madde: Mekteb nazırı mevad-ı sabıkada beyan olunan memurların ve hademenin kâffesine nazır ve merci olub içlerinden birinin hilaf-ı nizam ve kaide hareketi vukuunda ne lazım gelür ise derhal icra etmeğe ve her halde mektebin ve talebe ve hademesinin muhafaza-i nizam ve intizamıyla beraber fünun ve sanayice maksad-ı asli olan terakkiyatın istihsal-i esbab-ı muktaziyesine memurdur.

Otuz beşinci madde: Mektebin müdir ve muavin ve ketebe ve sair hademesi hin-i nasb ve intihablarında muteber kefil ve senede rabt olunarak senedatı nazırın nezdinde hıfz olunacaktır.

Otuz altıncı madde: Mektebin cuma ve bayram ve paskalya günlerinden maada tatil eyyamı olmadığından nazır ve müdirler ile muavinler ve memurin ve hademe-i saire her gün hazır ve mevcud bulunub geceleri ve tatil günleri dahi her şubede müdir ve muavin ve kâtiplerden birisi nöbetçi kalacaktır.

Otuz yedinci madde: Talebe ve şakirdanın elbisesine muktazi olan eşyanın ve imalat içün iktiza eden âlat ve edevat ve mevad-ı sairenin mübayaatında müdirlerin ve icab eder ise muavinlerin dahi reyleri munzam olmak lazımdır.

Otuz sekizinci madde: Mektebde talim-i sanayi eden usta ve muallimlerin yevmiye ve şehriye maaşları ve aşçı ve câmeşuycu gibi hademe ücretleri nazır ve müdirlerin reyiyle tayin olunub anlardan maada bi'l-cümle memurların maaşları riyasetden bi'l-istizan oranın tasdikiyle tahsis kılınır.

İkinci