273

Mektebde kaç sene bulunmuş ise o kadar müddet yani beş sene oturmuş ise
beş sene müddet işleyeceği san'atın patent rüsumundan muaf olub işbu
muafiyet yedindeki şehadetnameye derc edilecektir.
Kırk sekizinci madde — Her sene imtihanda talebe ve şakirdanın bir sınıftan diğer
sınıfa nakillerinde sanayi muallimlerine mükafat olmak üzere birinci sınıftan ikinci
sınıfa kaç şakird nakl etmiş ise her biri içün kendüye san'at talim
etmiş olan ustaya yüz ve üçüncü sınıfa nakl edenlerin her biri içün
on beşer ve dördüncü sınıfa nakillerinde yirmişer ve beşinci sınıfa geçenler içün
yirmi beşer guruş ve kezalik her sene kaç kişiye şehadetname verilir ise
anın dahi her bir neferi içün ustasına otuz guruş verilecek ve ilim
hocalarına dahi mümkün ve münasib mükafat icra kılınacaktır.
Kırk dokuzuncu madde — Fen-i makine ilim ve amelisinin tahsili altı yedi seneye
mütevakkıf olduğundan işbu san'atın tahsiliyle şehadetname ahzı içün beş seneden
ziyade kalan talebenin altıncı ve yedinci sene ücretleri sunûf-ı saire şakirdanının
ücret-i yevmiyelerinin iki katı olacaktır ve makine fenni içün altıncı sınıftan
yedinci sınıfa nakl eden ve yedinci dereceye vusûl ile makine fenninden şehadetname
alan şakirdin muallimine sair sınıflar ustalarına verilen mükafatın iki katı
ifa olunacaktır.

( İkinci Fasıl )
( Mekteb talebesinin umur-ı zabıtasına ve müstahak-ı ceza olanların )
( terbiyesine dairdir )

Ellinci madde — Ceza üç nev' olub birincisi hapis ve ikincisi riyazet
ve üçüncüsü mektebden harice salıverilmemek üzere tevkif cezalarıdır. Hapis
cezası talebeden birinin atide beyan olunacak ahvalden dolayı töhmet
ve kabahati bil-muhakeme tayin ettikten sonra Nazır tarafından kabahatına göre hükm
olunarak ve müddet-i hapis yedindeki jurnale dahi yazılarak mahkumun aleyh olan
şakird hapishanede tevkif olunmaktadır ve müddeti on iki saatden bir maha
kadar olur. Riyazet cezası kezalik talebeden birinin ahval-i atiyeden dolayı
töhmet-i hafifesi üzerine hükm olunarak müddet-i mahkumiyetinde mahkumun aleyhe