277

( Islahhânelere Dâir Nizâmnâmedir ) (*)
( Mukaddime )

Islahhânelerin nizâmâtı esâsen üç bâba münkasim olub birincisi islahhânelere alınacak atfâl ve eytâmın şerâitini ve infâk ve iksâsını ve tahsîl edeceği ulûm ve fünûnun derecâtını muarrif olmağla üç fasılda zikr olunur ve ikincisi islahhâne me’mûrlarının sûret-i tertîbine ve vâridât ve masârifât ve a’mâlâtın keyfiyet-i rü’yet ve cereyânına ve şâkirdânın ta’lîm ve terbiyesi hakkında olan hareket ve vazîfe-i me’mûriyetlerine dâir olduğundan bu da üç fasla taksîm edilir ve üçüncü bâb şâkirdânın suver-i tahsîliyesiyle her husûsda fi’l ve amel ve hareketlerini ve nizâm ve usûle mugâyir cünha ve kabâhat ashâbından olanların te’dîbât-ı cezâiyelerini ve ilim ve san’atçe tahsîlât ve terakkiyâtına göre haklarında lâzım gelen mükâfâtın derecelerini mutazammın bulunmağla bu bâb dahi kezâlik iki fasla münkasim bulunur.

( Bâb-ı Evvel )
( Birinci Fasl )
( Islahhâneye alınacak ve kabûl olunacak eytâm )
( Ve atfâlin şerâit-i lâzimesi beyânındadır )

Birinci Mâdde — Islahhâneye alınacak çocuklar yerli ve yabancı ve İslâm ve Hristiyan her ne olur ise müsâvâten kabûl olunub fakat sin ve san’atlarınca şurût-ı âtiyenin bulunması elzemdir şurût-ı mezkûrenin birincisi alınacak çocuk on iki on üç yaşından yukarı olmamakdır ikincisi babası ve anası olmayub öksüz ve yetîm olmak veyâhûd bunların yalnız birisi olsa da amelmânde ve fakr u zarûret ashâbından olması cihetle çocuğunu idâreye muktedir olamamak husûsudur üçüncüsü islahhânece müddet-i muayyenesi gelmeksizin çocuğun ihrâcı hakkında velî ve akrabâsı taraflarından bir gûna...

----------------------------------------------
(*) İşbu nizâmnâme Tuna vilâyetine mahsûs olmak üzere mevzû’ iken muahharan kâffe-i vilâyât islahhânelerine ta’mîm kılınmış olduğundan mündericâtında Tuna vilâyetine mahsûs olan ba’zı fıkarâtın bi’t-tab’ vilâyât-ı sâireye şümûlü yokdur.