31

Askeriyesini mübeyyin sancak idare meclisinden nümunesine tevfikan gelecek mazbatalar kazalarda olan kuyûduyla ba‘de’t-tatbik kazaca yapılması icab eden mazbatalar kaza idare meclisinden Mart ibtidasında tanzim olunup vergi misillü bâlâsında taksitleri gösterilip mahalle ve köylere gönderilecek ve bedelât-ı askeriyeye mahsus olan eda tezkireleri renkli kâğıt üzerine matbu olduğundan her mahalle ve kariyenin bedelât-ı askeriyesinden taksitlerine isabet edecek mebaliğ kaç kuruş ise ona göre iktizası kadar evrak kaza başlarından tahsildarlara teslim ile taksit ibtalarında mahalle ve köylere gönderilip taksiti içinde akçeleri mahalle ve kariyenin heyet-i umumiyesinden talep olunacaktır.

Onuncu madde: Bedelât-ı mezkûrenin suret-i tahsiliyesi ve taksitini vaktiyle vermeyenlere lazım gelen muamelâtın keyfiyet ve ahval-i müteferria-i sairesi vergi hakkında beyan olunan kaidenin aynı olduğundan o kaideye tatbikan iktizaları icra ve beşinci maddede beyan olunduğu veçhile ilk taksitler için ashab-ı ziraat ve hiraset tazyik edilmeyip mümkün mertebe ashab-ı ticaret ve servetten istifa ve sekizinci maddede izah ve beyan kılındığı veçhile bedelât-ı mezkûreden ba‘de’t-tevzi‘ sahihan mazereti musaddak olanlar bulunduğu halde o makuleler hisselerinin dahi bend-i mezkûrda gösterildiği veçhile son taksite behemehal tesviyesi çaresinin istihsaline itina kılınacaktır.