320

On üçüncü madde: Cevanib-i erbaası divar ile muhat arazi derununda veyahut havlı ve bahçe ve haneye ve ya bunlara yüz elli zira‘ bu‘d mesafede vaki‘ araziye mutasarrıf olan kimsenin rızası tahsil olunmaksızın mil ve burgu ile kuyu hafı ve baca küşadı ve edevat-ı madeniye vaz‘ı içün mağaza inşası caiz olmadığından o misillü maden tahrisine sahib-i arazi irza olunacaktır.

On dördüncü madde: Sahibi razı olmayan ve ya arazi-i haliyeden bulunan bir mahalde maden tahrisi mutlaka hükümetden ruhsat-ı resmiye istihsaline mevkuf olduğundan böyle mahallerde maden tahri edecek kimse evvel mahalli ve kangı liva ve kaza dahilinde bulunduğunu ve ne cins maden arayacağını ve mahal-i mezkûrun sahibinin isim ve şöhretini ve orasının hafrinden terettüb edecek zarar ve ziyanı tazmin edeceğini istidânâmede tasrih ile vilayet valisine ita eyledikde merkez-i vilayet meclis-i idaresinde bil-müzakere şerait-i lazimesine muvafık olduğu halde kefil ve senedat-ı lazimeye rabt olundukdan sonra ruhsatnâme tarihinden itibaren nihayet bir seneyi tecavüz etmemek üzere maden tahrisi içün vali-i vilayet canibinden yedine ruhsatnâme verilecektir ve bu vechile vali-i vilayet canibinden verilen ruhsatnâmenin bir sureti maden idaresine malumat verilmek içün Nâfia Nezaretine gönderilecektir.

On beşinci madde: Balada muharrer müddet-i tahrinin inkızasında bil-icab temdidi istenilir ise şerait-i mevzuasının tecdidiyle daha altı ay temdid müddeti caiz olabilecektir.

On altıncı madde: Tahri ve keşf-i madene me’zun olan kimsenin ruhsatnâmesi tarihinden itibaren nihayet altı aya kadar tahriye bed’ ve mübaşeret etmesi lazım gelip bu müddet içinde mübaşeret etmemiş veyahut edip de ikdam ve devam göstermemiş olur ise sebebi kendisinden sual olunarak kabule makrun mazereti olmadığı halde ruhsatnâmesi ibtal olunup zuhur edecek diğer talibe ruhsat verilecek ve işbu ruhsatnâmenin istirdadından dolayı bir gûne masraf iddiasına salahiyeti olmayacaktır.

On yedinci madde: Maden tahrisine me’zun olan kimse haiz olduğu ruhsatı...