336

olunacak ve bu istidalar taraf-ı vilâyetden kalhâne ve yafabrikayı inşâ edecek kimesneye tebliğ edilerek cevabının itâsına bir müddet ta’yîn kılınacakdır.

Toksanıncı madde — Ta’yîn olunan müddetin inkizâsında vâliy-i vilâyet evrak-ı mevcûde-i takımıyla maâdin mühendisine irsâl eyleyecek ve mühendis dahi tahkîkât-ı lâzımenin icrâsı zımnında lede’l-hâce mahalline azîmetle tanzîm eyleyeceği takrîrinde mülâhazât-ı mahsûsa-i fenniyesini gösterdikden mâadâ kalhâne ve fabrika inşâsı içün vukû bulan teşebbüsâtın ve ânın üzerine terettüb eden itirâzâtın derecât-ı muhassenât ve fevâidini ve fenâ ittihâzı îcâb eden usûlü ve sâhib-i imtiyâza teklîf olunacak şerâiti ve bir de resm olunmuş olan harîtanın sahîh olub olmadığını tafsîlâ beyân eyleyecekdir.

Toksan birinci madde — Ma’den mühendisi bu husûsa dâir evrâkı takımıyla vâliy-i vilâyete iâde edecek ve vâliy-i vilâyet dahi mülâhazâtını ilâvesiyle berâber evrâk-ı mezkûreyi Maâdin-i Hümâyûn Meclisi tarafına irsâl eyleyecekdir.

Toksan ikinci madde — Maâdin Meclisi tarafından tensîb olunacak vezâif ve şerâitin derciyle lâzım gelen ruhsatnâme tanzîm ve kalhâne ve fabrikanın ehemmiyetine göre on aded Osmânlı yüzlük altınından elli altına kadar alınması lâzım gelen fermân harcı dahi takdîr ve tahdîd ve Bâb-ı Âlî’ye takdîm edilerek Şûrâ-yı Devlet’de tedkîkâtı icrâ olundukdan sonra lede’l-arz şeref-sünûh buyurulacak irâde-i seniyye mûcibince fermân-ı âlîsi itâ kılınacakdır.

Toksan üçüncü madde — Masârifi sâhibine âid olmak üzere fermân-ı âlînin hâvî olduğu şerâit gazete ve i’lânnâmeler vâsıtasıyla neşr ve işâat olunacakdır.

Toksan dördüncü madde — Fabrika ve yakalhâne [veya kalhâne] sâhibleri tarafından ta’dîl ve tebdîl olunmak murâd olunur ise müceddeden vaz’ olunacak makine ve âlât resimlerinin takdîmiyle keyfiyeti vâliy-i vilâyet tarafına beyân olunarak oradan dahi bunlar maâdin mühendisine veyâ ma’den meclisine irsâl kılınacakdır.

Toksan beşinci madde — Her ne vakit olur ise olsun mühendisin takrîri
üzerine