347

Üçüncü fasılda beyân olunan vukûâtın tahkîk timur yol hademesinin istid‘âsı üzerine teftîş me’mûrlarından biri tarafından icrâ olunacak ve yalnız bu me’mûrun tenbîhi üzerine müttehem olan yolcuya müstahak olduğu cezâya dâir nizâmnâmede münderic olan fıkra kırâat olunduktan sonra indiği mevkifin baş me’mûruna cezây-ı nakdîyi teslîm ve i‘tâ edecektir ve komisere îsâl olunmak üzere alınan cezây-ı nakdînin makbûz senedi teftîş me’mûruna verilecektir.

Yolculardan biri işbu cezây-ı nakdîyi derhâl te’diyeden imtinâ‘ eder ise teftîş me’mûru ol kimesnenin isim ve şöhret ve kıyâfetini zabtiye ile komisere i‘lâm ve komiser dahi müttehemi meclise bi’l-ihzâr ‘inde’l-muhâkeme töhmeti sâbit olduğu hâlde cezây-ı nakdî alındıktan başka iktizâ eden da‘vâ masrafı dahi alınacaktır.

Yirmi ikinci mâdde: Timur yollarında zuhûr edecek cinâyet ve cünha ve kabâhatler ve hilâf-ı usûl hareketler hakkında tahkîkât icrâsını teshîl içün yola çıkarılacak her bir araba katarı nezdinde veyâhud her bir mevkifde komiserin emri tahtında olmak üzere bir teftîş me’mûru bulundurulacak ve me’mûr-ı mûmâileyh meşhûdu olan vukûâtı ve tahkîk etdiği kâffe-i husûsâtı derhâl komisere bildirecektir.

Fî 8 Safer sene 1284
Ve fî 30 Mayıs sene 1283