348

( Telgraf Nizamnamesi )
( Birinci Fasıl )
( Devletlerin Mükâtebat-ı Resmiyesi Beyanındadır )

Birinci Madde — Devlet-i Aliye tahriratı her bir tahrirata takaddüm edecek ve ücreti bil-hesab defter-i mahsusa irad ve masraf vechiyle kayd olunarak sene bütçesine dahi ol vechile idhal olunacaktır ve devlet tahriratı umumen memuriyette bulunan vükela-yı fiham ile memuriyet-i müstakile ve mühimmede bulunan memurin-i kiram ve taşralarda dahi vülât-ı izam ve mutasarrıfin-i kiram ile defterdaran ve kaymakamların imza-yı mahsuslarıyla mesalih-i devlet ve umur-ı mühimme-i memlekete dair olan tahrirat-ı mühimme demek olacaktır.

İkinci Madde — Devlet-i Aliye tahriratından sonra düvel-i ecnebiye sefaretleri taraflarından devletlerine ve konsolosları caniblerinden devletleri veyahut sefaretlerine yazılacak mekâtib-i resmiye sair tüccar ve eşhasın muharrerat-ı adiyelerine takaddüm edecektir.

Üçüncü Madde — Düvel-i ecnebiye sefaretleri ve konsolosları tarafından devletleri tarafına yazılmak ve Memalik-i Mahrusa’da bulunan konsoloslarından sefaretlerine ve sefaretleri caniblerinden konsoloslarına olmak üzere telgrafhaneye gelen muharrerata numro vaz’ıyla kangısı evvel gelmiş ise ibtida o nakl olunacaktır. Serian nakl ve isal olunmasının eşedd-i lüzumu olan bir tahrirat olmadıkça nakline bed’ olunmuş olan tahriratın arası kesilmeyecektir.

Dördüncü Madde — Düvel-i ecnebiye sefaretleri ve sair memurları tarafından taati olunacak muharrerat-ı resmiyenin rusumatı dahi tarife-i umumiyeye tatbikan ve sair tüccar muharreratının rusumatına tevfikan ahz ve istihsal olunacaktır.

( İkinci Fasıl )
( Tüccar Muhaberatı Beyanındadır )

Beşinci Madde — Herkes telgrafname irsaline me’zun olup fakat boş tel olduğu halde adi telgrafnameler muhaberat-ı resmiyeden sonra taati kılınacaktır.

Altıncı Madde