357

( Dokuzuncu Fasıl )

( Telgrafhane muhaberatını öğretmek içün telgrafhaneye alınacak şakirdân )
( hakkında olan nizamnâmedir )

Kırk dokuzuncu madde: Şakirdânın aded-i esnânı on sekizden nihayet otuza kadar olacaktır.

Ellinci madde: Bir telgraf şakirdi lâyıkıyle okuyup yazmağa ve oldukça bir şey kaleme almağa muktedir olmadıkça ve ilm-i hesabı dahi bilmedikçe alınmayacaktır.

Elli birinci madde: Her bir şakird ashab-ı iffet ve istikametten bulunduğunu ve bir töhmetle müttehem olmadığını mutazammın iki muteber zat tarafından şehadetnâme ibraz edecektir.

Elli ikinci madde: Şakirdân-ı mûmâileyhimin Dersaadet telgrafhanesinde adedi nihayet on iki ve taşra telgrafhanelerinde ikişer neferi tecavüz etmeyecektir. Ve zikrolunan taşra telgrafhanelerine alınacak şakirdânın evvel emirde yazısı ve şehadetnâmesi ol memalik telgraf müfettişleri tarafından telgraf idaresi cânibine gönderilerek ruhsat istihsal olunmadıkça alınmayacaktır.

Elli üçüncü madde: Şakirdân-ı mûmâileyhim muharreratın esrarını ketm edeceklerine ve telgrafın kavânin ve nizâmâtına ittibâ eyleyeceklerine Dersaadet’te Telgraf Meclisinde ve taşralarda memleket meclislerinde tahlif olunacaklardır.

Elli dördüncü madde: Fransızca olarak icra-yı muhabere içün alınacak şakird yalnız Dersaadet telgrafhanesine mahsus olarak bunların adedi dahi nihayet altı neferi tecavüz etmeyecek ve Devlet-i Aliyye teb’asından olmayan kimse şakirdliğe kabul olunmayacaktır.

Elli beşinci madde: Şakirdân-ı mûmâileyhim baş memurlarla muallimlerine ittibâ ve itaat göstereceklerdir.

Elli altıncı madde: Kâffe-i şakirdân Telgraf Müdürünün huzurunda muallimleri hazır bulunduğu halde bil-imtihan maharetlerini ispat edemedikçe ve sair şurût-ı matlûbeyi ikmal etmedikçe muhabere memuru tayin olunmayacaklardır.