363

( Telgraf memurlarının vezaif-i memuriyet ve derecat-ı hizmetlerine dair )
( Nizamname suretidir )

( Telgraf Muavinliği )
Muavin-i mumaileyh idarenin kâffe-i memurlarına nezaret edecek ve vuku bulan evamirin ve ittihaz olunacak tedabirin hüsn-i icrasında müdür nezdinde mesul bulunacak ve Türkçe müraselat-ı telgrafiye hesabatının tetkik ve mukabelesine ve bundan başka mektep şakirdanının tahsil-i fenleri nezaretine memur olacaktır.

( Türkçe Muhaberat Kalemi )
İşbu kalemin baş muhabere memuru muavinin taht-ı idaresinde olup idarenin Dersaadet ve taşralarca vuku bulacak muhaberat ve mekâtibatı kaleme alacak ve bunun maiyetinde iki memur olup biri tebyizata ve diğeri kuyudata bakacaktır.

( Sevk-i Mekâtib-i Telgrafiye Kalemi )
İşbu kalemin bir baş sevk memuru olup teati olunacak tahrirat-ı telgrafiyeleri sahiplerine vakit ve zamanıyla hüsn-i isale ve bunlarda muharrer mevadın kimesneye faş olunmamasına ve mavsıl-ı muharrerata nezaret eylemeğe memur olacak ve bunun maiyetinde üç memur olup bunlar teati olunan tahrirat-ı telgrafiyeyi tebyiz edip nereden gelmiş ve nereye gönderilmiş ve kaç kuruş ücret alınmış olduğunu suretleriyle beraber deftere kayd edecektir.

( Muhaberat-ı Ecnebiye Memuriyeti )
Muhaberat-ı ecnebiye için bir memur olup muavin-i mumaileyhin taht-ı maiyetinde olarak Memalik-i Osmaniye’de bulunan merkezler Devlet-i Aliyye’nin taht-ı mukavelesinde bulunduğu düvel-i saire telgrafhaneleriyle vuku bulacak muhaberatı kaleme alacaktır.

( Sevk-i Mekâtib-i Ecnebiye Kalemi )
İşbu kalemin bir baş memuru olup teati olunacak tahrirat-ı ecnebiye-i telgrafiyeleri sahiplerine vakit ve zamanıyla hüsn-i isale ve bunlarda muharrer mevadın kimesneye faş olunmamasına ve mavsıl-ı muharrerata nezaret eylemeğe memur...