403

Yirmi Altıncı Madde
Meskûkât hakkında devletçe lüzûm görünen ba‘zı tenbîhâtın icrâsına teşebbüs olunduğu hâlde bi'l-cümle köşe sarrâfları lonca odası vâsıtasıyla bu misillü olunacak tenbîhâta inkıyâd ve imtisâle mecbûr olacaklardır.

Yirmi Yedinci Madde
İşbu nizâmnâme ahkâmı teb‘a-i ecnebiyeden olan köşe sarrâfları hakkında dahi aynen icrâ olunacaktır. Ve silk-i esnâfa dâhil olan ecnebîler kâ‘ide-i usûl-i memlekete tâbi‘ olacaklarından bunlar lonca odasına teb‘a-i devlet-i aliyyeden kefîl irâesine mecbûr olacaklardır.

Yirmi Sekizinci Madde
İşbu nizâmnâmenin i‘lânı târîhinden i‘tibâren nihâyet bir ay zarfında tamâmıyla mevki‘-i icrâya konulacağından o vakte kadar bi'l-cümle köşe sarrâfları ruhsat tezkiresi ahzine mecbûr olacaklardır. Binâen aleyh gelecek ayın birinci ve ikinci gününde tezkeresiz bulunanların dükkân ve odaları kapatılacak ve ferdâsı tezkeresiz bulunanlar hakkında ikinci maddenin hükmü icrâ kılınacaktır.

Fî 4 Cemâziyelevvel sene 1281