415

( Tersane ve Tophane-i Amire idarelerine muktazî kerestenin )
( Tedarik ve itası hakkında nizamnamedir )
( Fasl-ı Evvel )
( Mirî ormanlarından verilecek kerestenin )
( Suret-i kat’ ve itasına dairdir )

Birinci Madde — Memalik-i Devlet-i Aliye’de bulunan mirî ormanlarının kâffesi nizamat-ı mahsusa tahtında olmak üzere Maliye Nezaret-i Celilesi tarafından muhafaza ve idare olunacağından Tersane ve Tophane-i Amire’ye muktazî kereste Nezaret-i müşarüleyha canibinden mevad-ı âtiye ahkamına tevfikan doğrudan doğruya idareleri tarafına ita kılınacaktır.

İkinci Madde — Her sene Mart ibtidasından evvel Tersane ve Tophane idareleri sene-i âtiye içün kendilerine muktazî ağacın cins ve aded ve takriben hacmini vilayet ve sancak ve mümkün olduğu derece mevki ve orman tasrihiyle beyan ve iş’ar eyleyeceklerdir.

Üçüncü Madde — Madde-i sabıkada beyan olunduğu üzere taleb edilecek ağaçlar orman idaresi ve Tersane ve Tophane memurları taraflarından birlikde intihab olunarak ve mensub oldukları daire namına damgalanarak üzerlerine sırasıyla numro vaz’ olunacaktır.

Dördüncü Madde — Ağaçların damgalanması ve muamelat-ı sairenin icrasıçün iktiza eden orman memurları Nezaret-i müşarüleyha tarafından nasb olunacak ve muamelat-ı mezkûrenin mevsim-i icrası Tersane ve Tophane idareleriyle bilmuhabere tayin edilecektir.

Beşinci Madde — Ağaçların damgalandığı zaman Tersane ve Tophane memurlarıyla bilittifak bir zabt ceridesi kaleme alınıb bunda evvelâ idareler tarafından taleb olunan ağaçların bulundukları yerler ve götürülecekleri mahaller ve saniyen damgalanan ağaçların cins ve aded ve hacm ve sıra numroları gösterilecek ve bunun bir nüshası Nezaret-i müşarüleyhaya ve diğeri Tersane ve Tophane-i Amire idarelerinden hangisine aid ise oraya irsal olunacaktır.

Altıncı Madde — Mevad-ı sabıkada beyan olunan muamelatın icrasından sonra ağaçlar...