431

( Posta Nizâmnâmesidir )
( Birinci Fasıl )

( Postalarla nakl olunan evrak ve eşyaya dâirdir )

Birinci madde Her nevi mektûb ve gazete ve eyyâm-ı muayenede çıkarılan risâleler
ve ağırlığı iki kıyyeyi tecavüz etmeyen bilcümle evrak paketleri münhasıran Devlet-i
Aliyye postasıyla nakl olunur

( Âtiü'z-zikr evrak ve eşya inhisardan müstesnâdır )
Evvelâ fermân-ı âlî ve mesâlihe dâir evâmir-i nâme-i sâmî ve eyyâm-ı muayenede çıkarılmayan
risâleler ve kütüb-i mütenevvia eczâsı Sâniyen açık mektûblarla posta ücreti
verilmiş olan mekâtib Sâlisen defter ve harita ve resimler Râbian tavsiyenâmeler
ve havâle mektûbları ve daâvîye müteallik evrak ve emlâk ve akar ve her nevi sihâm
senedâtı Hâmisen kürek ve sefîne ve araba bilet ve tezkireleri ve komisyoncu defteri

İkinci madde Âtiü'z-zikr eşya ve evrak posta çanta ve hurçlarına sığacak
ve postalarla gidebilecek hey'et ve mikdarda olmak şartıyla inhisar tahtında
olmayarak postalarla nakli mücâzdır Evvelâ altun ve gümüş meskûkât
Sâniyen her nevi mücevherât ve hafif olan zî-kıymet eşyâ-yı sâire Sâlisen bilcümle
eşyâ-yı ticâriye nümûnesi Râbian vezni iki kıyyeyi tecavüz etmeyen kütüb-i
mütenevvia ile her dürlü harita ve resim ve evrak-ı matbûa ve gayr-ı matbûa paketleri

Üçüncü madde Postahânelere vürûd eden evrak ve eşya paketleri içinde
ücreti mütefâvit olan ve inhisara dokunan evrak ve eşya bulunup bulunmadığını
ve bertaraflarında mektûb makâmına kâim olur muhâbereye müteallik kelimât muharrer olup
olmadığını anlamak içün posta me'mûrlarının ol paketleri muâyeneye
salâhiyetleri olacak ve gazetelerin üzerine mürselünileyhin isim ve şöhret ve mahall-i
ikâmetinden mâadâ hatt-ı destle hiç bir şey yazılmayacak ve şâyed yazıldığı halde
mektûb add ve itibar edilüp aña göre resmi istifâ kılınacaktır

Dördüncü madde Bir adamın eşyası içinde inhisara dokunur mektûb ve sâire
olduğu posta ve rüsûmât me'mûrlarından birine haber verilir ve o me'mûr-ı merkûm