423

Dokuzuncu Madde: Her nev‘i mektûb postelere vürûdundan i‘tibâren yirmi dört sâ‘at postahânelerde bekletdirilerek ashâbı gelüb taleb eyledikde derhâl verilecekdir. Müddet-i mezkûre zarfında ashâbı gelmez ise Dersa‘âdet’de olduğu hâlde şehir postesi vâsıtasıyla sâhiblerine gönderilerek mürselünileyhden kırk pâre şehir postesi ücreti alınacağı misillü taşra postahânelerinde kezâlik yirmi dört sâ‘at bekleyen mekâtib hitâm-ı müddetde müvezzi‘ler ma‘rifetiyle ashâbına irsâl olunarak bunların taahhüdlülerinden kırkar ve ‘âdîlerinden yirmişer pâre ücret-i kademiye ahz olunacakdır.

Onuncu Madde: Bir âdem mürselünileyh tarafından me’zûniyeti olmaksızın hîle ve desîse ile dîger âdemin mektûbunu ahz eylediği tahakkuk eder ise kânûnen mücâzât olunur.

On Birinci Madde: Mekâtib-i ‘âdiyenin üzerine okunaklı yazı ile mürselünileyhin bulunduğu mahal ve ism ve evsâfı ve mümkün olduğu takdîrde hânesinin sokağı ve numarası dahi tahrîr olunacakdır.

On İkinci Madde: Bir âdem İstanbul’da olub da taşraya gidecek olur ve ba‘de kendisi almak üzere mektûbun postahânede kalmasını ba-varaka-i mümhüre taleb ve ifâde eder ise o makûle mektûblar ashâbının talebine kadar tevkîf edilecekdir.

On Üçüncü Madde: Taşradan vürûd edecek mektûbların zarfı üzerinde postahânede tevkîf olunsun ‘ibâresi yazılmış bulunduğu hâlde sâhibinin gelüb alacağı güne kadar tevkîf olunarak bunun içün bir gûne resm ve ücret alınmaz.

On Dördüncü Madde: Açıķdan verilmeyüb de mektûb içine devlet eshâmı ve banka kâimeleri ve senedât ve meskûkât ve mücevherât vaz‘ etmek memnû‘ olub bu misillü mektûblar poste me’mûrlarına verildiği hâlde kabûl olunmayacak ve bunlar postelere verilir veyâ poste sandıķlarına atılır da mu’ahharan zâyi‘ olur ise postahâneler tarafından tazmînât da‘vâsına aslâ salâhiyet olamayacakdır.

On Beşinci Madde: Posteye verilüb dahâ mahalline gönderilmemiş olan bir mektûb üzeri veyâ içi yanlış yazılmış olmasından dolayı tashîh içün veyâhud