436

Esbab-ı taayyüşünden bulunan bir çift öküzü ile çift edevatı zinhâr ve zinhâr
füruht ettirilmeyip düyunu imhal ile ziraat müdürü ve vekilleri marifetiyle
suret-i iktidarlarına ihtimam olunarak mahsulat-ı mütehassılasından bittedric
ahz ü istifa ettirilecek ve bu hususu ser-rişte ile tahsilat-ı miriyeye
sekte getirmek veyahut şuna buna gadr etmek misillü halat vukua
getirilmeyecektir.
Erbab-ı ziraat beynlerinde ziraate ve yekdiğerin arazi-i mezruasına ika’
olunan zarar ve hasar ve sair bu nev’ şikâyata dair vukubulan daavi ve münazaat
her ne mahalde rüyet olunur ise o mahallin ziraat müdürü veyahut vekili
dahi hazır olduğu halde fasl u rüyet olunacaktır.
İşbu memuriyet-i hususi kâffe-i umurun akdem ve elzemi olduğundan bu babda
matlub-ı âli veçhile hareketle bâis-i tahsin ve aferin olunur hüsn-i hizmet
ibraz edenler sâye-i meâli-vâye-i cenâb-ı mülkdârîde nâil-i mükâfat olacağı misillü
bu sırada ahali ve fukaradan avaid ve saire namı ve nam-ı aharla habbe-i vâhide
ahz etmemek veyahut ziraat müdürü ve vekili bulunanlar kendi tarla ve mezariinin
tesviyesinde ve hususat-ı sairelerinde ahaliyi meccanen çalışdırmaları caiz
olmayacağından buna mütecasir olanlar mes’ul ve muatab olacaklardır.

Fî 17 Şaban sene 1280