443

cidârı beyninde ve kezâ divâr-ı mezkûr ile etrâfında bulunan hâne ve ebniye-i sâirenin müşterek divârları beyninde lâ-akal yarımşar arşın mahall-i hâlî bulunacaktır.

Dördüncü Madde: Birinci sınıftan olan müvellidü'l-buhâr kapalı bir mahalle vaz‘ olunup çatı ebniyesi gâyetle hafîf olacak ve hiç bir tarafa ittisâli olmayacaktır.

( İkinci Fasıl )
( Mütenevvi‘ Emniyet Âletleri Beyânındadır )

Beşinci Madde: Her müvellidü'l-buhârın sath-ı fevkânîsinde iki aded emniyet supapı tesmiye olunur âlet olacaktır ve her supaba dahi yek-pâre olarak bir sikal vaz‘ ve tahmîl olunacak ve mezkûr supabın mikdâr-ı kutru sikalinin dahi nihâyet derecesi ve verilecek ruhsat tezkerelerinde tayîn ve tahdîd kılınacaktır.

Altıncı Madde: Müvellidü'l-buhârın derûnunda olan tazyîk ne derecelerde olduğu bissehûle yek-nazarda bilinmek içün ateşçinin gözü önünde münâsib bir mahalde tazyîk-i havanın ve küsûrâtının derecâtına münkasem tazyîk veznesi tesmiye olunur bir âlet bulunacaktır ve işbu tazyîk veznesine gelecek buhârın borusu bizzat müvellidü'l-buhâra merbût olacaktır. Vezne-i mezkûrenin aslâ tecâvüzü câiz olmayan derecesi üzere gâyetle âşikâr olarak bir hat yâ diger bir işâret bulunmak lâzımdır.

Yedinci Madde: Her müvellidü'l-buhârın besleyici bir aded su tulumbası veyâhud bir âlet-i mahsûsası bulunacak ve bunun işleyişi gâyetle emniyetlü olacaktır. Her bir müvellidü'l-buhârın derûnunda bulunacak suyun sathı müvellidü'l-buhâr-ı mezkûrun veyâhud derûn cidârının sath-ı hâricîsinde olarak bir hatt-ı muayyen ile işâret olunacaktır ve bu hat dahi tarafının harâret kovuklarının veyâhud ulv ve duman borularının irtifâından lâ-akal dört parmak ziyâde olacaktır.

Sekizinci Madde: Her bir müvellidü'l-buhârda âlet-i sâbiha telâş tesmiye olunur bir âlet mevcûd