443

443

Mevcûd olacakdır. Âlât-ı mezkûre her vakit müvellidü’l-buhârın derûnunda irtifâ-ı mâ’ yedinci maddede zikr olunan hatdan iki parmak nüzûl eder ise bir müneffes-i mahsûs küşâd ederek buhar dahi andan hurûc birle ıslık çalar gibi zuhûr edecek sadâ tehlikeyi ihtâr etmiş olur.

Dokuzuncu Madde: Her müvellidü’l-buhârda suyun derece-i irtifâını gösterir bir sırça boru veyâhûd muhtelif irtifâlarda münâsib vechle mevzû‘ musluklar olacakdır.

( Üçüncü Fasıl )
( Kompüver Tesmiye Olunur Tütünü Mahv İden )
( Âlâtın İsti‘mâli Beyânındadır )

Onuncu Madde: Bundan böyle vapur makinesi bulunan fabrika sâhibleri müvellidü’l-buhârlarının ocaklarında hâsıl olan dumanı kompüver âletiyle kâmilen ihrâk ve imhâ eylemeğe veyâhûd mezkûr ocaklarda odun ve kok ta‘bîr olunur kömürden ziyâde duman vermeyecek mahrûkât isti‘mâl etmeğe mecbûr olacaklardır. Ve bu mecbûriyet şimdilik Dersaâdet ve Bilâd-ı Selâse’de bulunan fabrikalar hakkındadır.

On Birinci Madde: Anadolu Feneri’nden bed’ ile sâhilen Anadolu Hisarı’na ve andan Göksu derelerinin nihâyetden ve Çamlıcalar ve Kurbağalıdere verâlarından mürûruyla Fenerbahçesi burnuna kadar ve Rumeli cânibinde dahi Rumeli Feneri’nden başlayıp yine sâhilen Büyükdere’ye ve andan Beyoğlu’na giden cadde ile Kâğıdhâne ve Alibey köyleri ve Rami Çiftliği ve Yedikule verâlarından geçerek Ayastefanos karyesine değin hatt-ı münkesirlerin dâhilinde vâki‘ mevâkide ve dîger cânibden dahi bu dâirelerin sevâhilinde yapılmamak üzere işbu hudûdun hâricinde olarak vapur makinesi vaz‘ıyla fabrika inşâ etmek isteyenlere şerâit-i muayyenesine tatbîkan ruhsat verilecekdir.

On İkinci Madde: Bundan böyle her kim yeniden vaz‘ olunacak veyâhûd bundan mukaddem ruhsatsız olarak vaz‘ olunmuş müvellidü’l-buhâr ya‘ni sâbit vapur kazanı isti‘mâl etmek murâd eder ise âtîde zikr olunan mevâddı istid‘âsına derc ile Ticâret Nezâreti’nden ruhsat ahzine mecbûr olacakdır.