445

On altıncı madde: El-hâletü hâzihi mevcûd olan fabrikaların sâhibleri bu nizâmnâme târîhinden i'tibâren altı mâh zarfında makinelerinin ibkâsıyla isti'mâli zımnında istid'âlarını taraf-ı hükûmete takdîm edeceklerdir etmezler ise haklarında on üçüncü maddeye tevfîkan mu'âmele olunacaktır.

On yedinci madde: İşbu nizâmnâmeye mugâyir harekâtın teftîşi Ticâret Nezâreti veyâhûd Meclis-i Belediye tarafından ta'yîn kılınacak me'mûrîn ma'rifetleriyle icrâ olunacaktır ve bu misillü harekât dahi Meclis-i Ma'âbir'de bilâ-masârif rü'yet olunacak ve müttehem dahi istimâ' olunmak içün meclis-i mezkûra gelecek ve da'vâsının görüleceği gün dahi evvelce kendisine haber verilecektir.

(Madde-i Mahsûsa-i Muvakkate)

On sekizinci madde: İşbu nizâmnâmenin ikinci ve dördüncü maddelerinin icrâsı içün şimdi mevcûd bulunan vapur makineli fabrika sâhiblerine nizâmnâmenin târîhinden i'tibâren üç sene ve beşinci ve altıncı ve yedinci ve sekizinci ve dokuzuncu ve onuncu maddelerinin icrâsı içün bir buçuk sene ve üçüncü maddenin icrâsı içün dahi altı mâh mühlet verilmiştir.

Fî 9 Zilhicce sene 1278

(Madde-i Munzama)

İşbu nizâmnâmenin on birinci maddesinde muharrer ve mu'ayyen olan hudûd dâhilinde kâ'in mahallerde vapur makinesi vaz' ve ihdâsı memnû'iyeti dumanlı makinelere münhasır olup dumansız olduğu hâlde câ'iz olacaktır fakat makine vaz' olunacak mahal sâhilhâneler arâzîsinde ve mahalle içlerinde olamayacaktır ve evvel-emirde hükûmetçe tahkîkât-ı lâzıme ba'de'l-icrâ bir gûne mahzûru olmadığı tebeyyün eylediği hâlde ruhsat verilip mahzûru olduğu takdîrce ruhsat verilmeyecektir.

Fî 9 Zilhicce sene 1281