458

( Fi 3 Safer sene 1287 ilâve olunan fıkra )

Meclis-i beledi reisi her ay daire-i belediyenin varidat ve masarifatının icmalini şehremanetine ita eder her ayın icmali emanet meclisinde dahi bittedkik muvafık-ı usul olduğu halde aslı emanet muhasebesinde hıfz olunup musaddak bir sureti meclis-i beledi nezdinde sened olmak üzere riyasete irsal olunur.

Kırk sekizinci madde: İlânât ve tenbihât ve sair bilcümle evrak ve senedat reis ve başkâtib tarafından imza olunur.

( On İkinci Fasıl )
( Meclis-i Beledi Vezaifi Beyanındadır )

Kırk dokuzuncu madde: Her daire meclis-i beledisinin azası dokuzuncu fasılda gösterildiği vechile ahali tarafından intihab olunur.

Ellinci madde: Her dairenin vüsat ve ehemmiyetine göre meclis-i beledi azası on iki veya sekizdir.

Elli birinci madde: Otuzuncu maddede gösterildiği vechile ilk sene azanın nısfı kur’a keşidesiyle ve sonraki senelerde iki sene müddet-i intihabiyesini ikmal etmeleri hasebiyle tebdil olunur.

Elli ikinci madde: Meclis-i beledi haftada bir defa içtima eyler.

Elli üçüncü madde: Ledelhace şehremanetinin inhası üzerine taraf-ı devlet-i aliyeden meclis-i beledi heyeti tatil veya tebdil olunur.

Elli dördüncü madde: Reis tarafından bittanzim meclise verilecek muvazene defterini bittedkik kararlaştırmak ve varidat-ı dairenin balada beyan olunduğu vechile suret-i sarfını ve umur-ı maliyece ahval-i umumiyesini havi defterleri görüp tedkik etmek ve dairenin emlak-i mahsusası idaresini ve o misillü emlakin mübadele ve taksim ve füruhtı veyahut yeniden emlak mübayaası maddelerini kararlaştırmak ve bir sene zarfında vuku bulacak inşaatı her mahallenin derece-i ihtiyacına göre taksim etmek ve yol açmak veyahut tevsi ve tanzim eylemek ve inşaat-ı umumiye ve ameliye-i külliye münakasatını icra etmek ve umur-ı belediyece her nevi ıslahata dair rey vermek mecalis-i belediyenin vazifeleridir.

Elli beşinci