465

( Reis vekilleri beyanındadır )

Sekizinci bend: Reis vekilleri azây-ı meclisin ekseriyet-i ârâsiyle azây-ı mûmâ-ileyhimden intihâb ve tayin kılınacak ve müddet-i memuriyetleri üç sene ve hizmetleri dahi meccanen olacakdır.

Dokuzuncu bend: Azâdan müsin bulunanlar müsin olmayanlara takaddüm idecekdir.

Onuncu bend: Reis-i meclis hasta olduğu veyahud sâir bir gûne mânii zuhur etdiği takdirde reis-i sâni bulunan zât riyâsete mahsus olan bilcümle hukuk ve salâhiyet ile reis-i meclisin vekâletini icra idecekdir.

( Muavin beyanındadır )

On birinci bend: Muavin tayin kılınacak zât meclisin haricinden intihâb olunacakdır ve müddet-i hizmeti gayr-i mahdud ve fakat muvazzaf olacakdır.

On ikinci bend: Muavin-i mûmâ-ileyh meclis-i mezbur tarafından tayin kılınacakdır.

On üçüncü bend: Muavin-i mûmâ-ileyh meclisce karargîr olan mevaddın icrasıçün reis-i meclis bulunan zâta muavenet idecekdir ve meclis-i mezburun nizâmâtı dâhilinde olan karârını icrâya memur olacakdır.

On dördüncü bend: Muavin-i mûmâ-ileyh vuku bulan hususâtı reis-i müşarüileyhe beyan ve takrir idecekdir.

On beşinci bend: Muavin-i mûmâ-ileyh reis-i müşarüileyh tarafından tertib olunan bilcümle senedâtı reis-i müşarüileyh ile ve kezalik meclis tarafından tertib olunan senedâtı dahi azây-ı meclisle beraber imza idecekdir.

On altıncı bend: Muavin-i mûmâ-ileyh meclis tarafından celb olunduğu halde ifâde-i keyfiyete muktedir ise de meclisce olacak müzakerata dâhil olmağa salâhiyeti olmayacakdır.

( Baş kâtip beyanındadır )

On yedinci bend: Meclis baş kâtibi meclis tarafından tayin kılınacak ve maaşla hizmet idecekdir.