467

İmzalanub sandık eminine teslim olunduktan sonra emin-i mumaileyh vergiyi iktiza edenlerden üç defa mutalebe eyledikten sonra tahsil edemediği halde bu maddenin tevzi-i verginin sehven neş'et etmiş veyahud bir gûna özrü olmayarak teklif-i mezburun adem-i kabulünden ibaret bulunmuş olduğunu meclise ifade ederek eğer fi'l-vaki' ba'zı sehv ve hatadan neş'et etmiş ise derhal ıslah ve tesviyesine bakılacak ve eğer eda-yı vergi etmeyen kimesne bir vechle özür beyan edemeyerek muhalefeti yalnız taannüdden neş'et etmiş ise o halde meclis tarafından seksen dokuzuncu maddede beyan olunduğu vechle icabı icra kılınacaklardır.

(Mütercimler beyanındadır)

Yirmi yedinci bend: Mütercimler meclisin haricinden intihab olunacak ve hizmetlerinde muvazzaf olacaklar.

Yirmi sekizinci bend: Mumaileyhim meclis tarafından tayin olunacaklardır.

Yirmi dokuzuncu bend: Bunlar lisan-ı Türkî ve Franseviye âşinâ olacaklardır.

Otuzuncu bend: Mumaileyhim meclisin icab eden mazbatalarını kaleme alacaklardır ve kendilerine raci' olan bi'l-cümle hususatda reis-i meclis bulunan zatın ve a'zanın re'ylerine mutavaat edeceklerdir.

Otuz birinci bend: Mumaileyhim meclisce olacak müzakerata dahil olamayacaklardır.

(Mühendis ve mimarlar beyanındadır)

Otuz ikinci bend: Mühendis ve mimarlar icab eden ilm ve san'atı tahsil ve tekmil etmiş olan ve yedlerinde diplomaları bulunan mühendis ve mimarlardan olmak üzere meclis tarafından tayin ve intihab kılınacaklardır.

Otuz üçüncü bend: İşbu mühendis ve mimarlar muvazzaf olacaklardır.

Otuz dördüncü bend: Mumaileyhim icab eden mahallerin haritalarını tanzim ve resm ettikleri mahaller içün iktiza edecek masarifatı keşf ve takdir edeceklerdir ve kendilerine havale olunan işlerin gerek müddet-i inşaiyesinden ve metanetinden ve gerek masarifatı hakkında vaki' olan keşf ve takdirlerinden...