5

Dördüncü Madde: Mal virgü tahriri icra kılınan mahallerde tahrir kaidesince ve henüz tahriri icra olunmayan mahallerce de nizam ve usul-i mevzu’u vechle herkesin kudret-i maliyesine göre beyn’el-ahali taksim ve tevzi’ olunur. Efrad-ı ahalinin ayrı ayrı hisse-i teklifleri muayyen ise de hükümet-i seniye hisse-i umumiyesini mahalle ve karyeden taleb eder.

Beşinci Madde: Kıptiyan virgüsü dahi icrası kabil olan mahallerde nizamname-i mahsusasına ve olmayan mahallerce öteden berü cari olan usul ve kaidesine tevfikan istifa kılınır.

Altıncı Madde: Bedelat-ı askeriye teb’a-i gayr-i müslimenin hizmet-i askeriyeden muaf tutulması cihetle her mahalle ve karyenin gayr-i müslim olan ahalisi bu virgü ile dahi mükellefdir. Bunun suret-i tevzi’i dahi kezalik tahriri icra olunan mahallerde nisbet kaidesince ve henüz icra edilmeyen mahallerce de nizamat-ı mahsusasına tevfikan icra olunur.

Yedinci Madde: Mal-ı öşrün gerek maktu’an ihale ve gerek emaneten idaresi hakkında olan muamelatı nizamname-i mahsusiyle tayin kılınmış olduğundan ana tevfikan icra olunur. Varidat-ı rusumiyenin her nev’i dahi cari olan nizamatına veyahud bundan böyle yapılacak nizamlarına tevfikan istihsal olunur.

Sekizinci Madde: Mal virgü ve bedelat-ı askeriyenin gerek mahalle ve karyece ve gerek mahalle ve karyede efrad-ı ahalice vakit-i te’diyeleri nizamat-ı mahsusalarıyla muayyen olduğundan ve varidat-ı rusumiyenin evkat-ı istifası dahi kezalik nizamatiyle mukarrer bulunduğundan efrad-ı mükellefin hisse-i mahsusalarını ve her karye ve mahalle hisse-i umumiyesini eyyam-ı muayenesinde kâmilen te’diye ve ifaya mecburdur.

Dokuzuncu Madde: Mahalle ve karyelerde emval-i devletin birinci derecede vasıta-i tahsili her sınıf ahalinin muhtarları olmakla her mahalle ve karyede muhtaran mal-ı devletin vakit-i te’diyesinden bir hafta evvel efrad-ı mükellefine yegân yegân muayyen olan hisse-i virgüsünün bir haftaya kadar istihsaliyle nihayetinde kâmilen te’diye edeceğini ihbar edecekdir.

[Onuncu]