53

( İkinci Fasıl )
( Müteahhidlerin mültezimler ve sair müşterilerinde olan alacaklarının )
( suret-i istifası beyanındadır )

On üçüncü madde - Bir sarraf mültezim veyahud müşterisinden selb-i emniyet ederek arzuhal takdimiyle matlubatının te'diyesini iddia eylediği halde iltizamata müteallik hazineye müteferri ise Meclis-i Muhasebe-i Maliye'ye ve sair sarahaten mevadd-ı adiyeye ve hukukiyeye dair ise usulü üzere Hazine-i Hassa'ya havale kılınacakdır. Oralarda keyfiyeti tedkik olunarak emniyet-i kaviye ile terazi-i tarafeyn hasıl olduğu halde te'diye olunacak akçe iki tarafın muvafakat ve kabul edeceği suretle ve haline göre müddet-i mu'tedile ile ma-güzeşte taksite rabt olunacakdır ve medyun olan kimesnenin taşralarca tahsil olunacak matlubat-ı sahihası olduğu suretde mahalline mektub yazılarak ve tahsili hakkında icra olunacak muavenet ve muamele-i lazıme takdim kılınacak mazbatasına derc ile ifade olunacakdır.

On dördüncü madde - Sarraf ile müşterisi muhakeme ile tebeyyün edüp taksite rabt olunan matlubatının inkızay-ı müddet-i taksitde te'diyesine sarf-ı mesai etmeyenlerin ehl-i beytiyle ikametine kafi ve haline münasib olan ve kıymetçe ehven bulunan bir hanesi muhtac olduğu levazım-ı zaruriye-i beytiyesiyle beraber terk ile kusur emlak ve akar ve emval-i mevcude ve meşhudesi bil-müzayede sattırılıp ve bakaya-yı zimmeti var ise tahsil ettirilüp sarrafa olan deyni te'diye ettirilecektir ve medyuna terk olunacak hane zi-kıymet ise o dahi sattırılıp haline münasib diğer bir hane aldırılarak satılan çok kıymetli hanesi esmanından hasıl olacak fazla-i menafi dahi deynine mahsub olunacakdır.

On beşinci madde - Hasbe't-taahhüd sarrafanın iltizamat bedelatından dolayı mültezimleri zimmetlerinde olan alacakları ve iltizamın gayrı ahz ve italarından dahi altmış yedi senesinde te'sis olunan nizamın tarih-i vaz'ından itibaren müceddiden vuku bulacak muhasebeleri üzerine tahvile rabt olunacak