535

(Mağrûkîne mahsûs iâne mevki‘leri hakkındadır)
(Nizâmnâme lâyihasıdır)
(Fasl-ı Evvel)
(İâne mevki‘lerinin teşkîlâtı beyânındadır)

Birinci madde Büyükdere ve Fâkliçe ve Arnavutköyü ve Üsküdar Vaniköyü
ve Galata ve Balat ve Kumkapı sevâhilinde ve Kabataş nezdinde kâin Tophâne-i
Âmire ile Beşiktaş civârında vâki‘ Hayreddin İskelesinde mağrûkîn içün
bir iâne mevkii teşkîl olunmuşdur.

İkinci madde İâne mevki‘lerinin sâhil-i bahrde ve zabtıye mevkii civârında
otuz arşın terbî‘inde bir barakası olacak ve bunlar hükûmet tarafından
verilecek harîta vechle yapılacakdır.

Üçüncü madde Her iâne mevkiinde bir nefer cerrah ve bir nefer kayıkçı bulunacak
ve birinci maddede muharrer iâne mevki‘lerinin kâffesine âid vezâife muâvenet etmek
üzere ihtiyât cerrahı ve kayıkçısı nâmıyla iki nefer dahi fazlaca cerrah ve kayıkçı
istihdâm kılınacakdır.

Dördüncü madde İâne mevki‘lerinin teftîş-i harekâtı dâimî bir müfettişe muhavvel
olacakdır.

Beşinci madde İâne mevkii cerrahlarının Mekteb-i Fünûn-ı Tıbbiye’de küçük cerrahlık
fenni tahsîl eylemiş olmaları ve kayıkçıların tayfalık usûlünü bilmeleri ve müfettişin
fen-i tabâbetde şehâdetnâmesi olması meşrûtdur.

Altıncı madde İâne mevki‘leri barakalarına bir işâret sırığı merkûz olacak
ve bunlara resm-i mahsûs da tahlîs sancağı çekileceği gibi gark vukûunda
ihbâr ve istiâneye delîl olmak üzere sırıklara dahi muvakkat dîger bir işâret
bayrağı keşîde edilecektir.

Yedinci madde Barakalarda derece-i kifâyede edevât-ı tahlîsiye ve tahlîs olunan
mağrûkîn hakkında icrây-ı mudâvât ve ameliyât içün sâir edevât ve eşyâ-yı
lâzime bulunacak ve bunların nev‘ ve bahaları ve tecdîdi lüzûmu Nezâret-i Tıbbiye-i
Mülkiye tarafından tâyîn kılınup muhâfazası İdâre-i Belediyeye âid olacakdır.