542

Günleri bârgîr hammâlları ve pazar günleri dahi merkebler ta’tîl olunacak ve güneş doğmazdan evvel ve güneş batdıktan sonra yük taşınmayacakdır ve yük götürmege muktedir olmayan yaralu ve sakat hayvanlar kullandırılmayacakdır ve yük hayvanlarına yüz yigirmi ve merkeblere altmış kıyyeden ziyâde yük urdurulmayacakdır.

On dokuzuncu madde — Harîk mahallerinde olan arsalara sâhibleri veyâhud îcâra verilecek müste’cirleri şehremaneti cânibinden ruhsat tezkiresi almaksızın salâş inşâ edenler olduğu hâlde mucâsirleri bâ-jurnal şehir emâneti cânibine bildirilecekdir.

Yirminci madde — Dersaâdet ve bilâd-ı selâsede hâlî arsa ve vîrâneliklere lâşe ve ta’affün edici şeyler ve süprüntü atılmış olduğu görüldüğü anda derhâl üzerinden kaldırdılub denize ilkâ etdirilecek ve o makûle şeyleri atanlar görüldüğü hâlde doğruca şehremanetine gönderilecekdir.

Yirmi birinci madde — Şurada burada metrûk ağzı açık kuyular görüldüğü anda derhâl hendesehâne ma’rifetiyle îcâbına bakılmak üzere şehremanetine beyân olunacakdır.

Yirmi ikinci madde — Kahve ve lokantalara kurulan sobaların borularından akan suların gelüb geçenlerin üzerine atmamak üzere o makûle boruların altına tenekeden hunî vaz’ edilecek ba’zı borular yalnız ufak olarak çıkarılub ağzı zokağa karşı ırağılmış olduğundan işbu borular mehmâ hâl amûdî olarak ebniyenin saçağını aşırmak üzere sâhiblerine tenbîh olunarak ısğâ etmeyenler olur ise keyfiyet şehremanetine bildirilecekdir.

Yirmi üçüncü madde — Bilcümle esnâfın dükkânları hâricine tecâvüz ederek fıçı ve tabla ve kerevi ve sâire vaz’ edenler ve peşgûn ve destgâhını dışaruya temdîd edenler olduğu hâlde öyle dükkânın hâricine eşyâ vaz’ etmege bir vechle hak ve salâhiyeti olamayacağından bir gün evvel tenbîh ve ikincide kaldırmayan olduğu hâlde keyfiyet bâ-jurnal şehremanetine bildirilecekdir.

Yirmi dördüncü madde — Köprünün dış cânibinden ya’nî şirket vapurlarının iskelesine