581

mahsusuna kaldırılması re’s-i memuruna haber verilmiş olan eşya şayet numuneden
çıkarılamaz da iskelede kalır ise o halde mes’uliyet memurlara aid olacağından
o makule transit anbarına vaz’ olunacak eşya ashabı tarafından vaktiyle gümrük
iskelesine yanaştırılıb keyfiyeti re’s-i memura haber verilecektir.

( İskele muamelâtına dairdir ) (3)

Altmış üçüncü bend: Gümrük iskelesi tüccar malı içün olduğu ve âhâd-ı nâsa
mahsus olan iskeleler gibi bir takım bilüzum kayıklar gümrük iskelesine
bağlanması derkâr olan mahazire mebni tecviz olunmadığı cihetle ba’dema bu makule
kayık galebeliği olmamasıçün emtia gümrüğü re’s-i memurlarından iskele memuru
tarafından dikkat ve kayıkçıyana bir defa ekiden tenbih olunduktan sonra içlerinden
birisi istima’ etmediği surette ahz ve giriftiyle gümrük emaneti tarafına
götürülerek oradan te’dibat-ı lâzimesi icra olunmak üzere memur terfikiyle
şehremaneti canibine irsal edilecektir.

Altmış dördüncü bend: Tüccaranın gümrük iskelesine ihrac etmekde oldukları
emtia ve eşyalarının hîn-i ihracında sırasıyla sundurmalara vaz’ olunub
gümrük meydanında balya ve bunun emsali eşya yığılmasiyle galebeliği mucib hal
ve hareket vukua getirilmemesi iskele memurunun vazifesinden olub
çıkarılan denk ve saireleri sırasıyla güzelce istif ettirilüb bu babda
bir-gûna tekasül zuhurunda memur-ı markum mes’ul olacaktır.

Fî 12 Rebîü’l-âhir sene 277

(3) Mefsuhdur