585

Başka eşyâ idhâl kılınmış olmak şübhesini virebilecek bir gûne bozukluk
görülmedikçe gerek sâlifü'l-beyân esnâ-yı râhda bulunan gümrüklerde ve gerek eşyânın
varacağı mevrûd gümrüklerinde mezkûr denkler ile kablar vezn olunmayarak ve ne de
güşâd ile derûnlarında bulunan eşyâ muâyene ve ta'dâd kılınmayarak hey'etleri üzere
imrâr kılınacak ve fakat mevrûd gümrüklerinde kurşun mühürler ashâb-ı eşyânın
yanında kalmasıyla şunun bunun yedine geçüb sû-i isti'mâl olunabilememek içün denk
ve kaplarından bi-tamâmihâ kat' ile gümrükde alıkonulacakdır fe-ammâ zikr olundığı vechle
mühürler ile iplerinde ol-gûne şübheyi mûris bozukluk görülür ise o misillü
denk ve kaplar bütün bütün mühür urulmamış gibi nazar olunarak güşâd ile derûnlarında
bulunan eşyâ nizâmı üzere muâyene ve tezkiresiyle tatbîk birle mu'âmele-i îcâbiyyesi
icrâ kılınacakdır
Beşinci Mâdde: Dördüncü mâddede beyân kılınan şübheye mahal kalmamak içün cins
ve hey'etine göre bir denke veyâhud kaba kaç mühür urulmak iktizâ eder ise tüccâr
behây-ı mühri az virmek kasdile taleb ve ısrâr edecek olsa bile gümrük
me'mûrları lüzûmundan akall mühür urmayub urdukları mühürler ile sardıkları
ipleri denk ve kabın derûnuna sonradan eşyâ sokuşdurulamayacak sûretde
ihtimâmlı vaz' ve rabt itmeğe be-gâyet i'tinâ edecekleri misillü eşyânın ashâbı
dahi buralarına takayyüd birle öyle şübhe virecek hâlde mühürlenmiş denklerini
kaldırmayıb sâir varacakları gümrüklerde şübhe olunmayacak sûretde ihtimâmlıca
mühürlenmesine nezâret ve esnâ-yı râhda dahi işbu mühürler ile iplere bir gûne bozukluk
îrâs etdirilmeyerek hey'et-i asliyyelerinin muhâfazasına dikkat edecekler
ve itmedikleri takdîrde bâlâda zikri mürûr eylediği vechle vâki' olacak
şübheye mebnî eşyâlarının dîger gümrükde güşâd ve muâyene edilmesi mecbûriyyetinden
dolayı taraflarına terettüb edecek meşakkat ve su'ûbete sebeb mahzâ kendülerini
bileceklerdir

Fî 23 Cemâziye'l-ûlâ sene 1280

74