617

Mecburiye mebnî olmayarak mezkûr ilmühaber elli gün zarfında tashih olunup iade
kılınmaz ise cezire-i mezkûre rüsumat nazırı mezkûr şarabı irsal etmiş olan
manastırbaş ruhbanı tarafından işbu şarabın zecriye ve gümrük rüsumatını talep
ve ahz edecektir. Kıbrıs ceziresinde kâin Arazi-i Mukaddese manastırı tarafından
cezire-i mezkûrede bil-iştira bu vechile irsal kılınmış olan şarab zecriye
rüsumat-ı dahliyesinden muaf olup yalnız balada zikr ve beyan olunduğu vechile
mezkûr manastırbaş rahibi mezkûr şarabın Yafa iskelesine irsal kılındığını
mübeyyin tashih olunmuş ilmühaberini iadeye mecbur olacaktır. Arazi-i Mukaddese’den
başka mahallerde kâin manastırlar Memalik-i Mahruse-i Şahanede kâin sair manastırlara
şarab irsal etmek murad ettiklerinde imtiyazat-ı mezkûreden müstefid ve tekâlif-i
mezkûre ile mükellef olacaklardır. Latin manastırları tarafından mahallerinde kendi
kefaf-ı nefisleriçün yapılmış olan şarab zecriye rüsumatından muaf olacaktır.

On ikinci bend: Arazi-i Mukaddese manastırları ruhbanları olan Pernam papaslar ile
Sördoşarite nam rahibeler ve sair cemaat-i diniye elbiseleri büyük manastırların
Avrupa’dan ahz eyledikleri akmişeden imal olunarak zikr olunan rahib ve rahibeler
içün sair manastırlara irsal olunmakda bulunduklarından ve mezkûr büyük manastırların
bulundukları şehir rüsumat nezareti tarafından akmişe-i mezkûrenin vusulünde resm-i
gümrüğü işbu büyük manastırların muafiyeti miktarından tenzil kılınacağından elbise-i
mezkûrenin hin-i ihracında resm-i mezkûr büyük manastırlar muafiyetine iade ve ilave
kılınacaktır. Elbise-i mezkûre irsal olunduğu manastırların bulundukları şehre
vusullerinde icab eden resm-i gümrüğü şehir-i mezkûrda bulunan gümrük nezareti
tarafından mezkûr manastırlar muafiyeti miktarından bit-tenzil elbise-i mezkûre derhal
teslim kılınacaktır.

Fî 7 Zilhicce sene 1281

78