7

( Bab-ı Sani )
( Kazalarda emval-i devletin idaresi )
( Fasl-ı Evvel )
( Emval-i devletin tahsil ve kabzı )

On yedinci madde: Kazada emval-i devletin tahsiline kaymakam ve muhasebesinin ru’yet ve tanzimine mal müdürü memur olduğu gibi alel-umum emval-i devletin idare ve muhafaza ve hesabından kaymakam ile beraber mal müdürü müştereken mes’uldür. Masarifat-ı mukannene ve me’zunenin emr-i sarfı ikisinin inzimam-ı re’yine mevkuftur.

On sekizinci madde: Beher sene Mart ibtidasında sancak idaresi tarafından kazaya bir cihetde tahsil olunacak varidatın enva’ı ve diğer cihetde te’diye olunacak masarif-i mukannene-i mahalliyeyi mübeyyin kaza muvazenesi sureti namıyla bir defter gönderilip kaymakam ve mal müdürü andan tahsilatla masarifatı hesabını mes’uliyetleri altında olarak vermege mecburdur.

On dokuzuncu madde: Kazada emval-i devletin ahz ve kabzı içün bir sandık olarak teb’a-i devlet-i aliyeden kefillü bir sandık emininin yed-i muhafazasına tevdi kılınır. Ve bu sandık eminlerinin her ne milletden olur ise olsun beher hal Türkçe okuyup yazması ve hiç olmaz ise yalnız okumak bilmesi lazımdır.

Yirminci madde: Kuradan veyahud kasaba mahallatından sandığa akçe teslim olundukça her nev’ malın emr-i tahsiline dair sene ibtidasında verilmiş olan kaza idare meclisinin mazbatası zahrına teslimat-ı vakıa kangı taksitden olduğunu ve ne cins akçe idüğünü sandık emininin ifadesi üzerine mal müdürü kalemiyle işaret edip sandık emini ve mal müdürü ve emval-i miriye kabz ve sarfına mahsus olan mühür ile kaymakam sırasıyla temhir eyleyip bila-te’hir akçeyi teslim eden kimseye i’ta edecektir. Ve bu vechile vuku bulan tahsilat içün melfuf nümunesi vechile bir varidat defteri tutulup tahsilat ve teslimat-ı vakıa ruznamçe defterinden nakl ile ism ve nev’leri zeyllerine yazılacaktır. Ve işbu defterin bir aynı dahi tahsile memurların re’sinde bulunup mahalle ve karyelerden tahsilat vuku buldukça terkim kılınacaktır.

Yirmi birinci madde: Kura ve mahallata aid olan emvalden gayrı olup kaza…