725

Havale olunarak tetkikât-ı muktaziye icra ettirildikten sonra tebeyyün edecek
hâlin derecesine göre ol nâib hakkında tevbîh ve tebdîl ve bir müddet-i muayene
ile memuriyetten mahrumiyet ve bir sınıf tenzîl misillü muamele-i muktaziye icra
kılınacaktır. Ve şayet olunan şikâyetin bî-esâs ve sırf müfteriyâtdan olduğu
taayyün ve tahakkuk eder ise mütecâsirleri ceza kânûnnâme-i hümâyûnu ahkâmına
tevfîkan mücâzât olunacaktır.

On yedinci madde: Bilumum hükkâm-ı şer’iye hakkında devâir-i âliyeden ve vilâyetlerden
vârid olan tezâkir ve muharrerât ve evrak-ı sâire ve bunların bi’l-cümle istid’âları
meclis-i intihâba havâle ve îcâb ve iktizâsı tezekkür ve mütâlaa olunarak verilecek
karar tahrîren makâm-ı fetvâya beyân olunacaktır.

On sekizinci madde: İşbu nizâmnâmenin muhâfaza-i ahkâmı meclis-i intihâbın
esâs vazîfesi olduğundan hilâf-ı nizâm bir gûne hâl ve hareket vukûa
gelmemesine dikkat ve bi’t-tecrübe nizâmnâmeye derci iktizâ eden mevâd zuhûr eder
ise zeyl edilmek üzere meclisden bâ-mazbata makâm-ı meşîhate beyân olunacaktır.

On dokuzuncu madde: İşbu nizâmnâme ahkâm-ı mündericesine mugâyir olan
nizâmât-ı atîka ahkâmı münfesih olacaktır.

Fî 13 Muharremü'l-harâm sene 1290