772

Ahzı mümkün olduğu halde barutu tutan veya haber veren kimseye tutulan
barutun fey'-i mîrîsi hesabıyla bedelinin yalnız rubu ihbariye verilir ve cezay-ı
nakdîsi vermesi lazım gelen adam firar etmiş bulunur ise ele geçirilecek
eşyası marifet-i hükümetle satılıp esmanından lazım gelen cezay-ı nakdî
ahz olunduktan sonra fazlası kalır ise sahibine red olunmak üzere
hıfz olunur ve esman-ı mezkûre kâfi olmadığı halde her neye bâliğ ise bunun
rubu dahi barut bedelinin rubuyla beraber kaçağı tutana veya haber verene
ita kılınır.

On sekizinci madde: Bir mahalde efrad tarafından barut imal ve bey' olunduğu
halde âmil ve bayilerinden yapılan ve satılan barutların zaptı ve müstehlek
ise fey'-i mîrîsi üzere semeninin ahzıyla beraber bedelinin iki misli cezay-ı nakdî
alınacak ve bu nevi barutların keyfiyet-i imal ve bey'i hariçten haber verildiği
halde muhbirine madde-i sabıkada muharrer kaide veçhile ihbariye verilecektir.

On dokuzuncu madde: İşbu nizamnamenin on ikinci maddesinde muharrer olduğu
üzere bâ-ruhsat tayin ve küşad olunan mahallerin gayrı yerlerde satılması cihetiyle
müsaderesi lazım gelen mîrî barutun bayilerinden zapt olunacak barutun fey'
mîrîsinin dahi iki misli cezay-ı nakdî alınacak ve bu nevi barutların ihbariyesi
hakkında mezkûr on ikinci maddenin fıkra-i âhiresi hükmü cari olacaktır.

Yirminci madde: Kaçak tutulan barut Dersaadet'de ise Tophane-i Âmire
Müşiriyetine ve vilayetlerde ise hükümet-i mahalliyeye bila-bedel teslim olunur ise de
cezay-ı nakdîsi alınmayan barutların bedeli istifa edilir.

Fî 27 Safer sene 1288

Nizamat