775

Olan sefine üç aded Osmanlı yüzlük altını cezâ-yı nakdî verecekdir.

Yedinci Madde: Barut ve gaz gibi mühimmât ve mevâdd-ı nâriye ile meşhûn olan sefinelerin liman hudûdu derûnunda temur atmaları memnûdur. Bu misillü gemiler boğaz içinde ve açıkda lenger-endâz olacak ve bunlar mühimmât-ı nâriye yüklü olduklarına alâmet olmak üzere büyük direğine kırmızı bir bayrak çekeceklerdir.

Sekizinci Madde: Sûret-i mu'tâdede işlemekte olan Şirket vapurlarına mahsûs mevâki' ber-vech-i âtî beyân olunur şöyle ki Galata pîşgâhında numaralı şamandıra ile numaralı şamandıraların beyninde vâki' olan mesâfe Rusya Kompanya vapurlarına kezâlik Galata pîşgâhında numaralıyla murakkam şamandıradan numaralı şamandıraların ara yerleri Fransız Mesajeri Kompanyası vapurlarına mahal-i mezkûrda vâki' numaralı şamandıralardan numaralı şamandıralara kadar olan mesâfe Nemçe Lloyd Kompanyası vapurlarına Karantina önünde mevzû' numaralı şamandıra Bursa ve İzmid ve Tuna nehrine sûret-i dâimede işlemekte olan vapurlara ve İstanbul Gümrüğü pîşgâhında numaradan numaraya kadar vâki' olan mesâfe Londra ve Liverpool câniblerine dâimî sûretle işleyen İngiliz vapurlarına mahsûs olacakdır. Fevâid-i Osmâniye vapurlarıyla Azîziye Mısriye Şirketi vapurları Sarayburnu ile İstanbul Gümrüğü beyninde olan mesâfede duracaklardır. Sûret-i dâimede işleyip ve şirkete mensûb olmayan vapurlar hamûlelerini Galata limanında tahliye edecek oldukları hâlde İstanbul pîşgâhında Sarayburnu'ndan Gümrük'e kadar ve îcâbında Galata veyâhûd Tophâne önlerinde dahi durabilecekdir.

Dokuzuncu Madde: Gemiyi çeken vapurlar üçer üçer kıç taraflarında bağlı olarak Tophâne-i Âmire ile Sarayburnu pîşgâhında mevzû' numaralı şamandıralara bend olunacakdır.

Onuncu Madde: Boğaziçi ile Kadıkaryesi ve Adalar ve Ayastefanos'a işlemekte olan Fevâid-i Osmâniye ve Şirket-i Hayriye vapurları Cisr-i Cedîd'e yanaşacaklardır.