800

( İdare-i Umumiye-i Tıbbiye Nizamnamesidir )
( Fasl-ı Evvel )

( İdare-i Tıbbiye’nin Teşkilat ve Müteferriatı Beyanındadır )

Birinci Madde
Dersaadet’de Şehremaneti ve vilayâtta valiler tarafından umur-ı tıbbiye-i mülkiye nezaretiyle bil-muhabere hududu tayin kılınan her bir mahalde muvazzaf bir memleket tabibi bulunacak ve icab eden mahallerde memleket tabiblerinin refakatine bir tabib muavini dahi tayin olunacaktır.

İkinci Madde
Memleket tabiblerinin ve muavinlerinin maaşları daire-i memuriyetlerinin tabi olduğu idare-i belediye tarafından tahsis ve ita olunacaktır.

Üçüncü Madde
Dersaadet’de Şehremaneti ve vilayâtta hükümet-i mahalliye marifetiyle hududu tayin kılınmış olan dairelerde idare-i belediye canibinden belediye eczahanesi namıyla bir eczahane açılacak ve bunların daire-i belediyeye mahsus olduğunu mübeyyin kapıları üzerinde bir levha-i mahsusa olacaktır.

Dördüncü Madde
Memleket tabiblerinin usul ve şerâit-i intihabatı ve eczahanelerin tahsisatı mahsus nizamnamelerle tayin kılınacaktır.

( Fasl-ı Sani )

( Memleket Tabiblerinin Vezaifini Beyanındadır )

Beşinci Madde
Memleket tabibi idare-i belediye tarafından tayin ve ilan olunan mahalde haftada iki defa meccanen merzayı muayene edecek ve ol vakit gerek fakir ve gerek gani her kim kendiyi muayene ettirir ise anlardan hiç bir akçe kabul etmeyecektir.

Altıncı Madde
Meccanen muayene edilen günlerde tabib ve yanında muavini bulunur ise anın marifetiyle talep edenlere bilâ-ücret aşı icra edilecektir.

Yedinci Madde
Gerek gani ve gerek fakir her kim memleket tabibine müracaat eder ise anı muayene ve müptela olduğu marazına müdavata gayret ve müsaraat eyleyecek ve bizzat gitmeye iktidarı olmayan hastaların hanesine gitmeye tabib mecburdur.

*Sekizinci*